Almaty «aqyldy» qalalar reıtınginde ekinshi orynda tur
Onyń aıtýynsha, Almaty TMD men Shyǵys Eýropa aýmaǵyndaǵy qalalardyń kóshbasshy tobyna kiredi.
«Bizdiń megapolıs Máskeýden keıin «aqyldy» qalalar reıtınginde - ekinshi, al IDC reıtıngindegi tsıfrlyq jetilý deńgeıi - 2,7 ball. Tsıfrlandyrý týraly aıtqanda, protsesster «Almaty-2050» jáne «Tsıfrlyq Qazaqstan» baǵdarlamalarynyń strategııalyq maqsattaryna sáıkes kelýi tıis ekenin túsingen jón. Biz qalany tsıfrlandyrýmen qatar, turǵyndar úshin qolaıly jaǵdaı jasaýǵa tyrysamyz. Bizdiń basqarma «aqyldy» qalanyń 11 salasyn qamtı otyryp, túrli memlekettik organdar usynǵan 17 tsıfrlyq ofıtserdi bekitti», - dep atap ótti spıker.
Almatyda biryńǵaı derekter bazasy, sıngapýrlyq Smart City modeli boıynsha birqatar jobalar iske asty.
Atalǵan ІT-platforma memlekettik organdarǵa ózara derektermen dereý almasýǵa múmkindik beredi.
«Máselen, 2021 jyly qalany tsıfrlandyrý basqarmasynyń jumysyndaǵy basty baǵyt – biryńǵaı kommýnıkatsııalyq keńistik qurý, qala qyzmetine ІT keńesti tartý jáne qoldanbaly formattta ýnıversıtettermen ózara is-qımyldy qalyptastyrý boldy», - deıdi Baıan Qońyrbaev.
Negizgi ıdeıa – barlyq bilim mekemelerin, tehnoparkterdi, akseleratorlar men ІT-kompanııalardy tikeleı baılanysty qamtamasyz etetin bir platformaǵa biriktirý.
«Biryńǵaı kommýnıkatsııalyq keńistik – ІT bıznes, ІT talanttar jáne bilim klasteri úshin bir tereze. Qazirdiń ózinde platformada 1800 ІT talant, 17 ІT kompanııa tirkelgen, 18 bos jumys orny ornalastyrylǵan, 47 bilim kýrsy bar»,- dedi ol.
Spıker Almatynyń klasterlik damýy aıasynda qalalyq ІT kompanııalar ornalasatyn aýdandyq ІT habtar jobasynyń iske asyrylyp jatqanyn jetkizdi.
«Jeke ınvestorlardyń qoldaýy arqasynda qalada frantsýz baǵdarlama mektebiniń ECOLE 42 -Academie ONE Informatique modeli boıynsha jańa býyn baǵdarlamalaý mektebi qurylýda. Budan bólek, qala ákimdigi ІT kásipkerlerdi júıeli qoldaý úshin kezeńmen grant bóledi»,-dedi ol.