Almaty ákimi jumyrtqa baǵasynyń ósýine qatysty pikir bildirdi

ALMATY. QazAqparat- Almaty ákimi Baqytjan Saǵyntaev turǵyndarǵa esep berý kezdesýinde qalada azyq-túlik baǵasynyń ósý máselesine qatysty túsinik berdi, dep habarlaıdy QazAqparat tilshisi.

Tikeleı efır barysynda almatylyqtar ákimnen azyq-túlik baǵasyn turaqtandyrýdy surap, ásirese jumyrtqa baǵasynyń sharyqtap ketkenine shaǵymdandy.

«Qazir jumyrtqa baǵasy Almatyda ǵana emes, búkil Qazaqstan boıynsha ósken. Buny sala mamandary maýsymdyq ósim dep otyr. Búgingi jańalyqtarda Reseıde de osyndaı másele bolyp jatqany aıtyldy. Bul jaǵdaı aldaǵy ýaqytta turaqtalady dep oılaımyn»,-dedi ákim.

Sonymen qatar ol qaladaǵy azyq-túlik baǵasyn turaqtandyrý boıynsha qandaı jumystar atqarylyp jatqanyn tilge tıek etti.

«Byltyr bıýdjetten 7 mlrd teńgeden astam qarajat bólip, áleýmettik mańyzy bar taýarlardyń qoryn jasadyq. Ol kezde 18 tizim boıynsha baǵany ustap qaldyq. Bul - baǵa ósimi boıynsha eldegi eń tómengi kórsetkish boldy. Muny qolǵa almasaq, baǵa odan ary sharyqtap keter edi»,-deıdi Baqytjan Saǵyntaev.