Almaty ákimi jer ýchaskeleriniń revızııasyn qolǵa aldy
«Elbasy Joldaýynda jer qatynastary salasynda revızııa júrgizý, jerdi naǵyz ınvestorlarǵa berý kerektigi aıtyldy. Búginde Almatyda 2,4 myń jer ýchaskesi paıdalanýsyz jatyr. Olardyń 27 paıyzy aınalymǵa engizildi. 47 paıyzy qalalyq Memlekettik kirister departamentine ótkizildi. Bul jer ýchaskeleriniń ıeleri endi 10 ese joǵary salyq tóleıtin bolady. Al 3 ýchaskeniń ıesi jerlerin memleket menshigine qaıtaryp berdi. Bul baǵyttaǵy jumys jalǵasatyn bolady», - dedi qala ákimi Baýyrjan Baıbek.
Sonymen qatar, qalada ýaqytsha jalǵa berilgen jerler boıynsha da tekserý bastaldy.
Búginde prokýrorlar jalǵa alý aqysy tólenbegen 34 jer telimin anyqtady. Bul jerler memlekettik qorǵa qaıtarylatyn bolady.
Almaty qalasynyń bas prokýrory Berik Júıriktaevtyń aıtýynsha, sońǵy 10 jyl ishinde ýaqytsha paıdalanýǵa jalpy kólemi 3,7 myń gektar bolatyn 18 myń jer telimi berilgen. Onyń ishinde oblysqa tıesili jerler de bar. Adamdar jalǵa berý merzimi ótip ketse de, jerdi paıdalanyp kelgen ári ony uzartýǵa esh áreket etpegen. Sonyń saldarynan bıýdjetke jalǵa alý aqysy retinde eshqandaı qarjy túspegen.
Qala prokýrory Berik Júıriktaev sońǵy eki jylda megapolıstiń ınfraqurylymyn damytý, jol aıyryqtary men joldardy salý maqsatynda 300-den astam jer telimi qaıtarylǵanyn aıtty.
Keıbir ister boıynsha qujattardyń qoldan jasalǵandyǵy, jer baǵasynyń negizsiz kóterilgeni anyqtaldy. Osyndaı zańsyz is-áreketterdiń saldarynan memleketke 2,5 mlrd teńge shyǵyn kelgen. Prokýratýranyń atqarǵan jumysynyń arqasynda 1,5 mlrd teńge óteldi.
«Bul salada túrli quıtyrqy áreketter jasalady. Nysannyń árbir ıesi ótemaqy baǵasyn kóterýdiń túrli joldaryn izdestiredi. Olar úshin eń qolaılysy jalǵan qujattar men baǵany kóterý. Qylmyskerler barlyq qujattardy - jergilikti organdardyń sheshimderin, tehpasportty, nysandy iske qosý aktisin qoldan jasaıdy. Biz jalǵan qujattardyń 14 faktisin anyqtadyq, bulardan 2 mlrd teńge shyǵyn kelgen», - dedi Berik Júıriktaev.
Osylaısha, sotta qaralǵan 5 nysannyń alǵashqy quny 500 mln teńgege tómendegen. Taǵy 12 menshik ıesine qatysty is qaralyp jatyr. Bul ister boıynsha olardyń baǵasy 300 mln teńgege tómendeýi múmkin.
Jalpy, prokýrorlyq qadaǵalaý aktisi boıynsha qazirgi kezde Almatyda ıgerilmegen jer telimderiniń ıelerine 10 eselengen kólemde salyq salý jumystary qolǵa alynǵan.
«Mysaly, kóppáterli úı salynýy tıis 43,9 ga jer ýchaskesine 10 eselengen kólemde salyq salynsa, onyń kólemi 120 mln teńge bolmaq», - dedi qadaǵalaýshy organnan.
Aıta keteıik, Nursultan Nazarbaev bıylǵy qazan aıynda jarııalaǵan Joldaýynda jer qory men jyljymaıtyn múlik týraly biryńǵaı aqparattyq baza jasaýdy júktedi.
«Jer qatynastary men qurylys salasyndaǵy bıýrokratııalyq rásimder ózekti máselege aınalyp otyr. Bul salada ashyqtyq joq, halyq pen bıznes tolyq aqparat ala almaıdy. Sondyqtan, jer qory men jyljymaıtyn múlik nysandary týraly málimetterdiń biryńǵaı aqparattyq bazasyn jasaýdy tapsyramyn. Bul másele boıynsha tártip ornatyp, jerdi naqty ınvestorlarǵa berý kerek», - degen bolatyn Elbasy.
Prezıdent QR Bas prokýrory Qaırat Qojamjarovqa bos jatqan jerlerdiń ıesin tabýdy mindettedi.