Almaty ákimi jazýshylarǵa qandaı qoldaý kórsetiletinin aıtty
«Jazýshylar odaǵynyń qatparly tarıhy Almatymen tustasyp keledi. 85 jyl buryn boı kótergen odaqtyń birneshe býyny Almatyda qalyptasyp, osynda tabysty eńbek etti. Súıikti qalamyz týraly qalam terbemegen jazýshy, tolǵanbaǵan aqyn joq dese bolady. Qazir Almatyda Jazýshylar odaǵynyń 360 múshesi turady. Sol qalamgerlermen keń kólemde de, jeke de birneshe márte júzdesip pikir almastyq», - dedi shahar basshysy Baqytjan Saǵyntaev.
Ákimniń aıtýynsha, qala ákimdigi belgili shyǵarmashylyq ókilderiniń keshterin, kórmelerin, mereıtoılaryn uıymdastyryp keledi.
«Múmkindigine qaraı kitaptardy da shyǵaryp jatyrmyz. Bıyl zııaly qaýym ókilderimen jumys jasaýdyń jańa júıesin engizdik. Odaqtyń tikeleı usynysy boıynsha 150 grant taǵaıyndaldy. 90 grant óz ıelerine jetse, qalǵan 60 jyl sońyna deıin tabystalady. Aldaǵy jyldary iriktelgen 20-ǵa jýyq aqyn-jazýshylardyń kitaptarynyń jaryq kórýine qoldaý kórsetemiz. Bul baǵyttaǵy jumystar óz kezeginde aqyn jazýshy, dramatýrg, synshylardyń qalamyzdyń, tutastaı elimizdiń tynys tirshiligin sýretteıtin ádebı shyǵarmalar jazýyna septigin tıgizedi dep oılaımyz. El rýhanııatynyń ortalyǵy sanalatyn qalamyzdyń órkenıet jolynda ózderińizben aıanbaı eńbek etip, mádenıetimiz ben ádebıetimizdi damytý barlyǵymyzdyń ortaq mindetimiz dep esepteımin», - dedi Baqytjan Saǵyntaev.
«Egemen Qazaqstan» gazetiniń basqarma tóraǵasy Darhan Qydyráli bas gazettiń qazaq qalamgerleriniń shyǵarmashylyǵyn nasıhattaýda qandaı jumystar atqarylatynyn aıtty.
«Egemen Qazaqstan» gazetiniń tırajy 200 myńnan asatynyn ózderińiz bilesizder. Qazaq ádebıetiniń qazirgi jas ádebıetshilerine qoldaý kórsetý úshin jas qalamgerlerdi, esimi elge belgili qalamgerlerdi shyǵarýǵa tyrysamyz. Osy maqsatta arnaıy Ádebıet, Rýhanııat betin ashqanbyz. Rýhanııat betinde mádenıetimizdiń ár salasy teatr, kıno, proza, poezııa, dramatýrgııa týraly maqala jarııalanady. Qazaq ádebıetiniń qalamgerleriniń jumysy shalǵaıdaǵy keń oqyrmandarǵa jetý úshin osyndaı jumystar atqarylyp jatyr. Jaqynda «Úmit», «Eń qysqa áńgime» degen baıqaý ótkizdik. Saıtta turaqty túrde jas qalamgerlerdiń tyrnaqaldy týyndylaryn jarııalap turamyz. Saıası-ekonomıkalyq basylym bolǵanmen qazaq ádebıetiniń damýyna úles qosyp otyrmyz», - dedi Darhan Qydyráli.
Aıta ketý kerek, búgin Almatyda Abaı atyndaǵy qazaq memlekettik akademııalyq opera jáne balet teatrynda Qazaqstan Jazýshylar odaǵynyń qurylýyna jáne «Qazaq ádebıeti» gazetiniń ashylýyna 85 jyl tolýyna oraı pleným otyrysy ótti.