Almaty ákimi jastarǵa páter kiltin tapsyrdy

ALMATY. QazAqparat – Almaty qalasynyń ákimi Baqytjan Saǵyntaev qaladaǵy jumys istep júrgen jastarǵa páter kiltin tabys etti, dep habarlaıdy QazAqparat tilshisi.

Búgin «Nurly jer» memlekettik baǵdarlamasy aıasynda 29 jasqa deıingi jumys isteıtin jastarǵa 5 jyl merzimge 1050 jaldamaly páter berildi.

Taǵy 441 páter «Baqytty otbasy» jáne «Shańyraq» baǵdarlamalary boıynsha kópbalaly, tolyq emes jáne múgedek balalardy tárbıelep otyrǵan otbasylar arasynda jeńildikpen kredıt berý shartymen bólingen.

Páterler Naýryzbaı aýdanyndaǵy «Alma Sıtı 5» TK jáne Alataý aýdanyndaǵy «Mádenıet» TK-de «Nurly jer» baǵdarlamasy boıynsha salynǵan úılerde ornalasqan.

Almaty ákimi Baqytjan Saǵyntaev jumys isteıtin jastardy qoldaý 2019 jyldan bastap «Nurly jer» jalǵa beriletin turǵyn úı baǵdarlamasynyń Tuńǵysh Prezıdent - Elbasy N. Nazarbaevtyń tapsyrmasy boıynsha júzege asyrylyp jatqanyn atap ótti.

«Qalanyń damýyna óz úlesin qosatyn jastardy qoldaý – bizdiń basty mindetimiz. Memlekettik jáne qalalyq baǵdarlamalardyń arqasynda myńdaǵan qala turǵyndary qoljetimdi baspanaǵa ıe bolady», - dep atap ótti Baqytjan Saǵyntaev.

Almaty ákimi jańa qonys ıelerin el Táýelsizdiginiń 30 jyldyǵymen jáne kele jatqan Jańa jylmen quttyqtady.

Sony men qatar, «Almaty jastary» qalalyq baǵdarlamasy boıynsha ekinshi jyl qatarynan turǵyn úı satyp alý úshin myńdaǵan jeńildikti qaryzdar bólinýde.

Paıyzdyq mólsherleme – 5%, nesıe merzimi – 25 jyl.

Bıyl qaryz somasy 18 mln teńgege deıin ósti.

Aıta keteıik, Táýelsizdik kúni qarsańynda qalanyń kommýnaldyq turǵyn úı qorynan kezekte turǵan halyqtyń áleýmettik osal toptaryna 211 páter bólindi.

Turǵyn úı «Nurly jer» memlekettik baǵdarlamasy aıasynda salynǵan Alataý aýdanyndaǵy «Mádenıet» TK ornalasqan.

Jalpy, aldyn ala esepteýler boıynsha, ótken jyly Almatynyń 5 400 turǵyny baspanaly bolady.

Jyl basynan beri 3 903 adam turǵyn úımen qamtamasyz etildi.

Onyń ishinde, «Baqytty otbasy» respýblıkalyq baǵdarlamasy boıynsha (2-10-20) 441 nesıe, «Shańyraq» respýblıkalyq baǵdarlamasy boıynsha (5-10-20) 2 146 nesıe berildi.

«Almaty jastary» qalalyq jeńildikpen nesıelendirý baǵdarlamasy boıynsha búginde 973 nesıe berildi.

Kommýnaldyq turǵyn úı qorynan 343 páter bólindi.