Almaty ákimi UOS ardagerleri men qala turǵyndaryn Uly Jeńis kúnimen quttyqtady (FOTO)

ALMATY. QazAqparat - Búgin Almatyda 28 Panfılovshylar saıabaǵyndaǵy Máńgilik alaý aldyna 1941-1945 jyldar aralyǵynda bolǵan Uly Otan soǵysyndaǵy Uly Jeńistiń 71 jyldyǵyna arnalǵan merekelik shara ótkizildi.

Ashylý rásiminde sóz sóılegen Almaty qalasynyń ákimi Baýyrjan Baıbek Uly Otan soǵysynyń ardagerlerin, tyl eńbekkerlerin jáne qala turǵyndaryn osy uly merekemen quttyqtady.

«Ardaqty ardagerler, qurmetti qaýym! Barshańyzdy Uly Otan soǵysyndaǵy Jeńistiń 71 jyldyǵymenen shyn júrekten quttyqtaımyn! Búgingi qasıetti Jeńis kúni halqymyz úshin erekshe, mereıli kún! Bul Jeńis soǵysqa attanǵan qaısar rýhty maıdangerlerdiń qaıtpas erjúrektiligi men eldegi tyl eńbekkerleriniń qajyrly eńbeginiń jemisi. Memleket basshysy Nursultan Nazarbaev atap ótkendeı, Uly Jeńis bizge atalardyń qanymen, analardyń terimen keldi. Biz batyr babalarymyzdy ulyqtap, esimderin urpaq jadynda qashanda jańǵyrta berýimiz kerek», - dedi B. Baıbek.

Osydan keıin Qazaqstan Respýblıkasynyń ánurany oryndaldy. Odan soń, jınalǵan qaýym aldynan qurmetti qaraýyl rotasy saltanatty sap quryp júrip ótti.

Artynsha, Máńgilik alaýǵa gúl shoqtaryn qoıý rásimi bastaldy.

Quıyp turǵan jańbyrǵa qaramastan, Baýyrjan Baıbek bastaǵan Almaty qalasy ákimdiginiń ókilderi, Uly Otan soǵysynyń ardagerleri, tyl eńbekkerleri, Qazaqstan qarýly kúshteriniń, Aýǵan soǵysynyń ardagerleri, dıplomatııalyq korpýstyń ókilderi, Generaldar keńesi Tóralqasynyń músheleri, Almaty qalalyq jastar uıymdary men basqa da uıymdardyń ókilderi, sondaı-aq, qoldaryna soǵysqa qatysqan ata-babalarynyń portretterin ustaǵan qala turǵyndary áskerı orkestrdiń súıemeldeýimen lek-legimen jaqyndap kelip, Máńgilik alaýǵa gúl shoqtaryn qoıyp, batyrlar rýhyna taǵzym etti.

Tolassyz jaýǵan jańbyrǵa qaramastan gúl shoqtaryn qoıý rásimi áli de jalǵasýda.