Almaty ákimi tegin úıirmelerdi qarjylandyrý nege toqtatylǵanyn túsindirdi
Qala ákiminiń aıtýynsha, bul tek Almatyda emes, búkil elde kúrmeýli máselege aınalǵan.
«Bizde jyl basynda alynǵan mindetteme boıynsha qaryz paıda boldy. Sebebi, qazirgi «Art sport» júıesi bizge tirkelý ornynan bas tartýǵa múmkindik bermeıdi. Búginde bizdiń bıýdjetke qaryzymyz – 1,7 mlrd teńge. Men jergilikti bıýdjetti naqtylaý kezinde qaryzdy jabýdy josparlap otyrmyn. Ókinishke oraı, «Art sport» baǵdarlamasyna qatysqysy keletinderdiń kóp bolatynyn, mundaı qarajattyń qajet ekenin aldyn ala eskergen joq edik», - dedi qala ákimi.
Sondaı-aq, Erbolat Dosaev «Art sport» baǵdarlamasynyń málimetter bazasy oqý-aǵartý mınıstrliginiń bazasyna qosylmaǵanyn atap ótti.
«Keshe Almatyǵa Premer-Mınıstr keldi. Osy másele boıynsha da sóılestik. Úkimet basshysy «Art sport» baǵdarlamasy aıasynda qyzmetterdi usyný erejelerine qajetti ózgerister engizýdi Mádenıet jáne sport mnıstrligi men Oqý-aǵartý mınıstrligine tapsyrǵanyn aıtty. Jalpy, biz Almatyda shamamen 45 myńdaı bala «Art sport» baǵdarlamasyna qatysady dep boljaǵanbyz. Biraq, bala sany qazir eki ese ósip ketti, áli de kóbeıip jatyr. Sondyqtan, biz eń aldymen, osy saladaǵy saıasatty qalyptastyratyn ortalyq memlekettik organdarmen máseleni sheship almaqpyz. Keıin bul baǵytta jumysty jalǵastyramyz. Qaryzymyzdy jabamyz jáne jazǵy demalys ýaqytynda balalarǵa qyzmet kórsetýdi jalǵastyrýǵa qarajat tabýǵa tyrysamyz», - dedi Erbolat Dosaev.
Eske salaıyq, buǵan deıin QR Mádenıet jáne sport mınıstrliginiń aldyna kásipkerler men ata-analar jınalyp, «Art sport» jobasy aıasyndaǵy tegin úıirmelerdi qarjylandyrý máselesin birjola sheship berýdi talap etkenin jazǵan bolatynbyz.