Almaty ákimi kelesi jylytý maýsymyna sapaly ári ýaqtyly daıyndalýdy tapsyrdy

ALMATY. QazAqparat- Almaty ákimi Baqytjan Saǵyntaevtyń tóraǵalyǵymen jumys keńesi ótti. Onda kommýnaldyq qyzmetterdi jetkizýshilermen birge ótken jylý maýsymynyń qorytyndylary jáne jańa maýsymǵa daıyndyqtyń mindetteri qaraldy, dep habarlaıdy QazAqparat tilshisi.

Almatydaǵy 2020-2021 jyldardaǵy jylý maýsymy temperatýralyq rejımdi eskere otyryp, 2020 jyldyń 28 qyrkúıeginde bastalyp, 2021 jyldyń 13 sáýirinde aıaqtaldy.

Jalpy, 198 táýlikke sozylǵan jylý maýsymy qalypty rejımde ótti.

Baqytjan Saǵyntaevtyń tapsyrmasy boıynsha kommýnaldyq kásiporyndar barlyq jylýenergokeshenderine jáne kommýnaldy sharýashylyqtarǵa tekserý júrgizip, aldaǵy jańa jylý maýsymyna tııanaqty daıyndalýlary tıis.

Atap aıtqanda, «Almaty elektr stantsııalary» AQ elektr jáne jylý energııasyn taratatyn qurylǵylardyń 71-in, qubyrlardy, gıdro-qazandyq agregattardy, stantsııanyń sý jylytý jáne bý qazandyqtaryn jóndeýden ótkizýdi josparlaýda.

«Almatyjylýkommýnenergo» mamandary 48 qazandyqtaǵy jabdyqtardyń 75-in aýystyrýǵa tıis.

«Almaty jylý jelileri» 8,2 shaqyrym jelini rekonstrýktsııalaıdy.

Megapolıs ákimi Baqytjan Saǵyntaev jóndeý jumystaryn júrgizý kezinde jumys kestesin qalanyń basqarmalarymen kelisýdi tapsyrdy.

Sonymen birge, qazý protsessteri men joldy qalpyna keltirý jumystary baqylaýǵa alynady.

Joldardy qalpyna keltirý jumystary sapasyz júrgizilse, onda kommýnaldyq qyzmet kórsetýshiler jaýapqa tartylady.

Sondaı-aq, Baqytjan Saǵyntaev aýdan ákimderi men energotıimdilik jáne ınfraqurylymdyq damý,qalalyq mobıldilik basqarmalaryna jóndeý jumysy júretin shaǵynaýdan turǵyndaryn apatty-qalpyna keltirý jumysy, merzimi jáne jobany oryndaýshylar týraly der kezinde aqparattandyrýdy tapsyrdy.