Almaty ákimi qalanyń kommýnaldyq qyzmetiniń qysqa daıyndyǵyn tekserdi
Qala ákimi Baýyrjan Baıbek megapolıstiń barlyq aýdandarynda «jedel» jeli men ýchaske bastyqtarynyń, aýdan ákimderi orynbasalarynyń baılanys nómirleri jazylǵan aqparattyq stend ornatýdy tapsyrdy.
Qala ákimi jumys sapary barysynda kommýnaldyq qyzmet ókilderine jaıaý júrginshiler júretin trotýarlar men aýla ishin jedel tazartýda PIK-terdiń jumysyn barynsha kúsheıtý qajettigin eskertti.
Osy iske jaýapty merdigerlik uıymdardyń jumysyn baqylaý qalalyq Tabıǵı resýrstar jáne tabıǵatty paıdalanýdy retteý basqarmasynyń quzyryna berildi.
«Qalany rekonstrýktsııalaýǵa baılanysty jańarǵan dańǵyldar men kóshelerde arnaıy tehnıka, onyń ishinde kópfýnktsıonaldy Pony mashınalary, shaǵyn júktıegishter, jeńil traktorlar jumys isteıtin bolady. Al jumysshylar tóselgen zattarǵa aqaý túsirmeıtin arnaıy quraldardy paıdalanady», - dedi basqarma bastyǵy Áset Masabaev.
Onyń aıtýynsha, qalada jalpy kólemi 20 mln sharshy metr aýmaq qardan tazartý qajet. Kóshelerdi qysta 13 merdigerlik uıym, 1 285 arnaıy tehnıka tazartady. Jol tazalaıtyn jumysshylar sanyn 1 700-den 3 200 adamǵa jetkizý josparlanǵan.
Aýdandar boıynsha óndiristik bazalar qurylǵan, bul qar tazalaý jumystaryn 1,5 ese jedeldetedi. Jumysshylarǵa jaqyn tusqa modýldy konteınerler qoıylady, olar sol jerde kıinip, jylynyp, ystyq as ishedi.
Aıta ketý kerek, búgin Almatyda túnnen beri jaýǵan qardyń bıiktigi tańǵa jýyq 4 sm-ge jetken bolatyn. Qarbalas ýaqyttan soń qalada qar tazalaýǵa arnaıy 416 tehnıka men 1 045 jumysshy jumyldyryldy. Qala kóshelerinde 2 800 tonna kóktaıǵaqqa qarsy qum tógildi.
«Qazgıdromettiń» boljaýynsha, qar 13 qarashaǵa deıin jaýady. Qala ákimdigi kóktaıǵaq bolýy yqtımal bolǵandyqtan, júrgizýshilerge abaı bolýdy eskertedi.