Almaty ákimi qalanyń densaýlyq saqtaý júıesi koronavırýstyń úshinshi tolqynyna daıyn ekenin aıtty

ALMATY. QazAqparat - Almatydaǵy epıdemıologııalyq ahýalǵa arnalǵan onlaın baspasóz konferentsııasynda qala ákimi densaýlyq saqtaý júıesiniń koronavırýs ınfektsııasynyń úshinshi tolqynyna daıyn ekenin aıtty, dep habarlaıdy QazAqparat tilshisi.

Jýrnalısterdiń suraqtaryna jaýap bergen Almaty ákimi Baqytjan Saǵyntaev ótken jyly densaýlyq saqtaý ınfraqurylymyn nyǵaıtý úshin qabyldanǵan sharalar týraly aıtty.

«Búginde qalada 3 eshelonǵa bólingen 7 myń ınfektsııalyq tósek-oryn bar, onyń ishinde - 5 myń kereýet. Olardyń júktemesi 54%. Qazirgi ýaqytta ınfektsııalyq aýrýhanalarda 350 jaǵdaıy aýyr nasqas bar. Onyń 46-synyń jaǵdaı óte aýyr. 6 naýqas ÓJJ apparatyna qosylǵan. Invazıvti emes apparatta jáne HighFlo-da - 89 naýqas.

Statsıonarlarda 420 jansaqtaý orny bar, olardyń júktemesi 34% (152 naýqas)», - dedi qala ákimi.

Megapolıstiń tórt myńǵa jýyq patsıenti ambýlatorııada emdelip júr. Osy ýaqyt aralyǵynda úıdegi naýqastarǵa 409 mobıldi top pen telemedıtsına ortalyǵy emdeý boıynsha kómek kórsetti.

«Qazirgi ýaqytta COVID-19-ben kúresýge 8 500 medıtsına qyzmetkeri qatysýda. Rezervte 2 758 medıtsınalyq maman bar. Almatyda 25 PTR zerthanasy bar, olardyń barlyǵy jumys kúni de, demalys kúni de qabyldaýǵa daıyn. Barlyq zerthanalardyń táýliktegi qýaty - 14 500 synaq, biraq olardy 24 myńǵa deıin kóbeıtýge múmkindik bar»,- deıdi qala basshysy.

Almaty ákimi maska rejımi men áleýmettik ara qashyqty qatań saqtaý kerektigin eske saldy. Sondaı-aq, qala turǵyndaryn adam kóp shoǵyrlanǵan jerge barýdan bas tartýǵa shaqyrdy.