Almaty ákimi qaladaǵy problemalyq ýchaskelerge bardy

ALMATY. QazAqparat – Almaty ákimi Baqytjan Saǵyntaev jumys sapary kezinde turǵyndary birneshe márte kómek suraǵan Medeý aýdanynyń túıtkildi ýchaskelerinde boldy, dep habarlaıdy QazAqparat tilshisi.

«Dýman» yqshamaýdanynda 18,5 shaqyrym sýmen jabdyqtaý jáne 26 shaqyrym sý burý jelileriniń qurylysy aıaqtalýda. Qoǵamdyq kólik baǵyttary ótetin 6 kóshede — Han Táńiri, Qazyǵurt, Qarqaraly, Aqmeshit, Borabaı, Bolashaqta 3,7 shaqyrym jolda kúrdeli jóndeý jumystary bastaldy. Bul jumystardy qarasha aıynda aıaqtaý josparlanǵan»,– dep jazdy Baqytjan Saǵyntaev Instagram paraqshasynda.

Sonymen qatar, ol kelesi jyly qalǵan 53 kósheniń joly jóndeletinin atap ótti.

«Muztaý» yqshamaýdanynda ınjenerlik jelilerdi salýǵa baılanysty qazylǵan jol jabynyn tez arada qalpyna keltirýdi tapsyrdym. Býtakovka shatqalyna aparatyn joldyń uzyndyǵy - 4,6 shaqyrym. Bul jol týrıstik baǵyttardyń qataryna kiredi», - dep jazdy B. Saǵyntaev.

Taǵy bir máseleniń sheshimi jaýyn-shashynnan kóshkin júrýi yqtımal «Kompot» dep atalatyn massıvtiń turǵyndaryn qorǵaýǵa múmkindik berdi. Kókkınakı kóshesindegi qaýipti aımaqta 42 úı bolǵan.

Bıyl jyldyń sońyna deıin jalpy uzyndyǵy 350 shaqyrym bolatyn betkeılerdi nyǵaıtý josparlanǵan. Almalyq kóshesi boıyndaǵy eńisti nyǵaıtyp, aryq júıesin ornatý jumystary aıaqtaldy, mundaǵy qaýipti aımaqta 60 úı boldy.

Eske salaıyq, taý bókterinde turatyn turǵyndar kóshkin qaýpinen qorqyp, Almaty qalasynyń ákimi B. Saǵyntaevtan kómek suraǵan edi.

Onyń tapsyrmasy boıynsha qarajat bólindi jáne betkeılerdi nyǵaıtýǵa múmkindik beretin gabıon qurylymdarynyń qurylysy júzege asty.

Sonymen qatar, jańbyr sýyn aǵyzatyn aryqtar salynyp jatyr.