Almaty ákimi daýly saıabaqqa qatysty qaıtadan qoǵamdyq tyńdaý ótkizýdi usyndy

ALMATY. QazAqparat - Almaty ákimi Baýyrjan Baıbek «ıÝjnyı» saıabaǵyna qatysty daýǵa baılanysty qala turǵyndaryn qabyldady, dep habarlaıdy QazAqparat tilshisi.

Kezdesý kezinde Bostandyq aýdanynyń turǵyny Nadejda Erolskaıa «ıÝjnyı» saıabaǵynyń janynan kópqabatty turǵyn keshenin salý týraly másele kóterdi.

Atalǵan aýmaqta qurylys bastap jatqan «Turkuaz Invest» kompanııasynyń bas dırektory Zekı Pılge bul jerdiń jeke menshiktiki ekenin alǵa tartty.

Onyń aıtýynsha, qurylysqa bir úıden 100 turǵyn kelisip qol qoıǵan.

Taraptardy tyńdaǵan Baýyrjan Baıbek saıabaqqa jaqyn ornalasqan úıler turǵyndarynyń barlyǵynyń pikirin eskerý qajettigin aıtty.

Buryn ol saıabaqty jóndeý jobasyna aýdan turǵyndarynyń usynystaryn eskere otyryp túzetýler engizýdi tapsyrǵan edi.

«Sizder qoǵamdyq tyńdaýlar ótkizip, sodan keıin ǵana zańǵa sáıkes jaqyn ornalasqan úıler turǵyndarynyń basym kópshiliginiń ruqsatyn alýǵa tıissizder. «Nur Otan» partııasynyń doktrınasynda zańnyń ústemdigi - ádiletti qoǵamnyń negizi jáne barlyǵy úshin múmkindikterdiń birdeı bolýy dep kórsetilgen. 400-den astam turǵyn ákimdikke, partııaǵa ashyq hat jazyp, ózderiniń kelispeıtindikterin bildirgen. Sondyqtan 10 kún merzim ishinde qalalyqtar ótinish bildirgen «Nur Otannyń» alańynda qoǵamdyq tyńdaý ótkizip, zań júzinde sheshim qabyldaǵan jón», - dedi qala basshysy.

Óz kezeginde qala ákiminiń orynbasary Sultanbek Mákejanov bul másele boıynsha Qala qurylysy keńesi sheshiminiń keıinge shegerilgenin aıtty.

«Qurylysty júrgizýshi kompanııa bir úı turǵyndarynyń ǵana kelisimin alyp, qoǵamdyq tyńdaýdy talapqa saı ótkizbegen. Budan ózge, 2017 jyly Jerdi paıdalaný men qorǵaýdy baqylaý jónindegi basqarma atalǵan aýmaqtyń uzaq ýaqyt paıdalanylmaýy saldarynan bul ýchaskege shekteý qoıǵan bolatyn»,- dedi ol.

Sondaı-aq, «Nur Otan» partııasynyń qabyldaýynda ótken jıyn barysynda «Saıran» avtovokzaly men qalalyq ıppodrom tarıhı eskertkishterdiń bastapqy tizimine engiziletini belgili boldy.

Budan ózge, «Atakent» basqarýshy» kompanııasy jeke menshiktegi 8 ga jer ýchaskesin tegin qaıtarý týraly mindetteme qabyldady.

Buryn Almaty ákimdigi 23 gektar jerdi ýaqytsha jalǵa berý týraly kelisimniń kúshin joıǵan edi. Degenmen, kórme kesheniniń basshylyǵy «Qalalar jaıaý júrginshiler úshin» kontseptsııasyna saı aımaqty kóriktendirý jumystaryn odan ári jalǵastyratyn bolady.