Almaty ákimi bolǵan Baýyrjan Baıbek nesimen este qaldy

ALMATY. QazAqparat - QR Prezıdenti Qasym-Jomart Toqaevtyń Jarlyǵymen Baýyrjan Baıbek Almaty qalasynyń ákimi laýazymynan bosatyldy. 2015 jyldan beri Almaty qalasyna basshylyq etken Baýyrjan Baıbek qandaı oqıǵalarmen este qaldy. QazAqparat eleýli oqıǵalar sholýyn usynady.

Almatydaǵy sel

Tabıǵı apat jańǵa ákimniń kelýine deıin - 2015 jyldyń shilde aıynda bolsa da, onyń saldary men Naýryzbaı aýdany turǵyndarynyń máselesin Baýyrjan Baıbekke sheshýge týra keldi. Ákim kóshpeli jıyndar ótkizip, aýdan turǵyndarymen kezdesti. Onyń tusynda Qarǵaly ózeniniń arnasyn nyǵaıtý jumystary júrgizildi.

«Ońaı»

Baýyrjan Baıbek tusyndaǵy taǵy bir jańalyq «Ońaı» elektrondy bılet júıesi boldy. Megapolıstegi qoǵamdyq kólikterge dıfferentsıaldy tarıf engizildi.

Ýnıversıada

Qala ákiminiń kelýimen stýdenttik saıystarǵa daıyndyq pen ótkizýge arnalǵan bıýdjet 32 mlrd teńgeden 17 mlrd teńgege deıin eki esege únemdeldi. Qala 2017 jylǵy Ýnıversıadany abyroımen ótkizdi.

Qalanyń tarıhı ortalyǵy men kóshelerin rekonstrýktsııalaý

Baýyrjan Baıbektiń tusynda Almaty kóshelerine jóndeý jumystary belsendi júrgizildi. Panfılov kóshesiniń boıynda jaıaý júrginshiler zonasy paıda boldy. Abaı, Nazarbaev, Abylaı han dańǵyldary rekonstrýktsııalandy. «Atakent» iskerlik yntymaqtastyq ortalyǵyndaǵy alań qaıta ashyldy. Velojoldar men jaıaý júrginshiler joly kóbeıdi. Tarıhı ortalyqtyń úshten eki bóligi zamanaýı standarttar boıynsha jańǵyrtyldy.

Fýrmanov kóshesiniń Nazarbaev dańǵylyna aınalýy

2017 jyldyń qarashasynda máslıhat sessııasynda Fýrmanov kóshesin Nursultan Nazarbaev dańǵyly dep qaıta ataý sheshimi qabyldandy.

Kóliktik reforma

Baýyrjan Baıbek qalanyń kóliktik reformasyna kóp kóńil bóldi. Osylaısha, Almatynyń úlken aınalma jolynyń qurylysy bastaldy. Eki temir jol vokzalynyń rekonstrýktsııasy bastaldy. Jeke ınvestıtsııalar esebinen Almaty halyqaralyq áýejaıyn jańǵyrtý josparlanyp otyr. Qazaqstan boıynsha alǵash ret Almatyda qoǵamdyq kóliktiń jol ýaqytyn 32% azaıtqan BRT jelisi uıymdastyryldy. Odan bólek, metro jelileri salynyp, LRT qurylysy usynylyp jatyr. Birneshe kóshe birjaqty qozǵalysqa aýystyryldy.

Belka

Baýyrjan Baıbektiń tusynda tanymal art-nysan «Tıin» paıda boldy jáne ol qoǵamnyń qoǵamnyń kóp talqysyna tústi.

Kók Jaılaý

2015 jyly halyq narazylyǵan keıin Kók Jaılaýdaǵy kýrort jobasy toqtatyldy. Bılik jobany tolyqtyrdy jáne ońtaılandyrdy. Baýyrjan Baıbek Kók Jaılaý taý-shańǵy kýrortynyń týrızmdi damytýdaǵy mańyzdy nysan bolatynyn, onda birneshe adamnyń jumyspen qamtylatynyn aıtqan edi. Biraq, Prezıdent sózinen keıin qala bıligi jobany taǵy keıinge qaldyrdy.

Kópbalaly otbasylardy qoldaý

Keshendi qoldaý jumystary memlekettik járdemaqy, ataýly kómek, áleýmettik tólem, demeýshilik qoldaý jáne jumyspen qamtýǵa kómektesý sharalaryn qamtıdy. Sonymen birge, qalada «Baqytty otbasy» áleýmettik turǵyn úı baǵdarlamasy iske qosylady. Jalpy kópbalaly jáne az qamtylǵan otbasylardy qoldaýǵa bıýdjetten qosymsha 3 mlrd teńge bólindi.

Ákimdiktiń jańa qurylymy

Almaty ákimdiginde 12 basqarma qaıta atalyp, 6 basqarma taratyldy. Osylaısha, qalada jasyl ekonomıka, áleýmettik ál-aýqat, qalalyq utqyrlyq, energııa tıimdiligi jáne ınfraqurylymdyq damý jáne qalalyq josparlaý basqarmalary paıda boldy.