Almaty ákimi avtobýsta zeınetkerge arasha túsken qyzdy marapattady

ALMATY. QazAqparat- Almaty qalasynyń ákimi Erbolat Dosaev 15 jastaǵy Jannur Nurjanǵa qoǵamdyq kólikte qarııaǵa kómek kórsetý kezindegi meıirimdiligi, batyldyǵy úshin gramota men estelik syılyq tabys etti, dep habarlaıdy QazAqparat tilshisi.

«Siz túsirgen beıneni áleýmettik jeliden kórdim jáne kóptegen almatylyq sııaqty bul oqıǵa meni de beı-jaı qaldyrmady. Bir jaǵynan, jolaýshylardyń áreketine qynjyldym, al ekinshiden, sizdiń áreketińizge rıza bolyp, ózińizben maqtandym. Eresek adamnyń ózi mundaı qadamǵa baryp, kópshilikke qarsy turýǵa batyly barmas edi. Bizdiń Prezıdentimiz aıtqandaı, Ádiletti Qazaqstandy jaýapty ári adal azamattar ǵana qurady. Siz joǵary jaýapkershilik tanyttyńyz. Mundaı jastar barda, bolashaqqa degen senim zor», - dedi ákim kezdesýde.

Aıta keteıik, qamqor jasóspirimniń is-áreketi qazaqstandyqtardyń júregin jaýlady. Almaty qarjy-ekonomıkalyq kolledjiniń 2-kýrs stýdenti ózin qoldaǵandarǵa alǵys aıtyp, barlyq adamǵa qamqorlyq kórsetýge shaqyrdy.

«Ol adamnyń ornynda meniń atam bolýy múmkin edi dep oıladym. Sol sebepti basqasha áreket ete almadym. Qart adamdy sózben qorlaǵanyna, kemsitkenine shydaı almadym. Ózim atammen birge turamyn, oǵan árdaıym qamqorlyq, syılastyq tanytamyn. Meniń tárbıemde ol mańyzdy ról atqarady. Ómirde meıirimdi, qaıyrymdy jandardyń bir-birine kómek qolyn sozǵanyn qalaımyn», - deıdi Jannur.

Esterińizge sala keteıik, Almatynyń 119-shy marshrýtynda qart adam tosap salynǵan qumyrany baıqaýsyzda syndyryp aldy. Keıbir jolaýshylar ony qorlaı bastaǵanda, jasóspirim zeınetkerdi jaqtap, avtobýstyń edenin koftasymen súrtti. Beınerolık áleýmettik jelilerdi tarap, Jannur Nurjandy qoldaǵan júzdegen pikir jazyldy.