Almaty ákimi Arys qalasyndaǵy úılerdiń sapasyn tekserdi

ALMATY. QazAqparat - Baqytjan Saǵyntaev Almatynyń bıýdjeti esebinen salynǵan úılerdiń sapasyn tekserdi, dep habarlaıdy QazAqparat tilshisi.

Baqytjan Saǵyntaev Túrkistan oblysyna jumys saparymen bardy. Ol eń aldymen Arys qalasynda qaıta qalpyna keltirilgen úılerdiń sapasyn tekserdi.

Eske salsaq, qala 24 maýsymda bolǵan jarylys saldarynan aıtarlyqtaı zardap shekken edi. Búkil el bolyp jumylyp, qala qalpyna keltirildi. Ol úshin oblystar men respýblıkalyq mańyzy bar qalalar sany boıynsha Arysty 17 sektorǵa bóldi. Almatyǵa №14 sektor berildi.

Ońtústik astananyń jaýapkershilik aımaǵynda qalpyna keltirýdi qajet etetin 531 úı anyqtaldy. Onyń 503-i qaıta qalpyna keltirilip, kúrdeli jóndeýden ótti. 28 baspana jańadan salyndy.

Almaty sektorynda quramynda 300 qurylysshysy bar bes qurylys kompanııasy jumys istedi.

Aıta keteıik, 24 maýsymda Túrkistan oblysynyń Arys qalasynda ornalasqan áskerı bólimdegi oq-dáriler qoımasynda jarylys boldy. Jarylystarda 3 adam - Arys qalasynyń turǵyny jáne eki áskerı qyzmetker qaza tapty.

Túrkistan oblysyna arnaıy barǵan Qazaqstan Prezıdenti Qasym-Jomart Toqaev Arystaǵy áskerı bólimshedegi oq-dári qoımasyndaǵy jarylystan zardap shekken qala turǵyndarymen kezdesti.