Almaty ákimdiginiń birinshi qabaty halyqty qabyldaý úshin yńǵaıly jasalmaq

ALMATY. QazAqparat - Qaıta qalpyna keltirilip jatqan ákimdik ǵımaratynyń birinshi qabaty halyqty qabyldaýǵa yńǵaıly bolýy kerek. Bul týraly Almaty ákimi Baqytjan Saǵyntaev qalanyń tynys-tirshiligin qalpyna keltirý jónindegi qalalyq shtab otyrysynda aıtty, dep habarlaıdy QazAqparat tilshisi.

Almaty ákimniń orynbasary Muhıt Ázirbaevtyń aıtýynsha, ákimdik ǵımaratynyń tarıhı kelbeti qaıta qalpyna keltiriledi.

«QazǴZJI mamandarynyń aıtýynsha, ákimdik ǵımaratynyń syrtqy qabaty órtten qatty zaqymdalǵan. Sol sebepti ǵımarattyń qasbetindegi mármár tastaryn buzýǵa májbúr boldyq. Bizdiń maqsatymyz ǵımaratty tarıhı kelbetine qaıtarý. Tas jáne basqa materıaldardy jobany buryn syzǵan avtorlarmen jáne qaladaǵy sáýletshilermen birge tańdap, qalpyna keltiremiz» - dedi ákimniń orynbasary Muhıt Ázirbaev.

Baqytjan Saǵyntaev qala ákimdiginiń birinshi qabatyn halyqty qabyldaýǵa yńǵaıly etip jasaý kerektigin aıtty.

«Ákimdik ǵımaratynyń birinshi qabaty halyqpen ashyq kezdesýge yńǵaıly emes. Múmkin osy jaǵdaıdy paıdalana otyryp, Áleýmettik úıdi jasaǵandaı turǵyndarmen kezdesýge yńǵaıly etip jasaǵan durys shyǵar. Osy jaǵyn sáýletshilermen aqyldasyp kórińizder. Bul jurtshylyqpen kezdesýge, olarǵa qyzmet kórsetýge yńǵaıly bolar edi», - dedi Baqytjan Saǵyntaev.