Almaty ákimdigine jańa baspasóz hatshysy taǵaıyndaldy
Bul týraly ol óziniń Instagramdaǵy paraqshasynda jarııa etti.
«Dostar! Sizderge Qoǵammen baılanys qyzmetiniń basshysy, Almaty ákimi Baqytjan Saǵyntaevtyń baspasóz hatshysy retinde ún qatyp otyrmyn.
Almaty qashanda ómirdiń barlyq salasynda eń belsendi boldy jáne solaı bola beredi. Jýrnalıstik qaýymdastyq osynda qalyptasty, tipti kúni búginge deıin qalanyń BAQ-da otandyq jýrnalıstıkanyń metrleri jumys jasap júr.
BAQ-men ózara tyǵyz baılanys ornatý maqsatynda qala ákimdiginde baspasóz-ortalyǵy quryldy, osy pikirtalas alańynda basqarmalar men aýdandyq ákimdikter basshylary qalany damytýdyń ózekti taqyryptary boıynsha naqtyly aqparattar beretin bolady. Men sizderdi dıalogqa shaqyramyn», - dep jazdy Áset Muqajanov.
Áset Muqajanov 1990 jyly Qaraǵandy oblysynda dúnıege kelgen.
Beıjiń ekonomıkalyq ýnıversıtetin «álemdik ekonomıka» mamandyǵy boıynsha bitirgen.
Ár jyldary «Samuryq Qazyna» ál-aýqat qory AQ, «Bolashaq» halyqaralyq baǵdarlamalar ortalyǵynda, QR Aqparat jáne kommýnıkatsııalar mınıstrliginde qyzmet istegen.
2014-2016 jyldary Kommýnıkatsııalar jáne jańalyqtar basqarmasyn basqarǵan.
QR Prezıdenti janyndaǵy «Ortalyq kommýnıkatsııalar qyzmetiniń» resmı ókili bolǵan.
2016-2019 jyldary QR Premer-Mınıstri keńsesiniń qurylymynda eńbek etken.