Almaty ákimdigi jaýapsyz merdigerdi sotqa berdi

ALMATY. QazAqparat - Almaty ákimdigi №48 mektep-lıtseı ǵımaratyn rekonstrýktsııalaý merzimin buzǵany úshin merdiger kompanııany sotqa berdi, dep habarlaıdy QazAqparat tilshisi.

Almaty qalasy ákiminiń orynbasary Asqar Ámrın bıýdjet qarjysyna salynatyn problemalyq qurylys jáne rekonstrýktsııalaý nysandaryn aralap kórdi.

2021 jyldyń shildesinde bastalǵan №48 mektep-lıtseı ǵımaratyn qaıta jańartý boıynsha júrgizilip jatqan jumystyń barysymen tanysty.

Qurylystyń normatıvtik merzimi – 10 aı. Qurylys materıaldarynyń qymbattaýyna baılanysty 2022 jyly jobalaý-smetalyq qujattamaǵa túzetý engizildi.

Jumystyń aıaqtalý merzimi 2023 jyldyń 31 qańtaryna deıin uzartyldy.

«Rıgolıt» JShS merdigerlik uıymy mindettemesin sapasyz oryndaýyna baılanysty sotqa talap aryz berildi. Qazir sot protsesi júrip jatyr.

Búginde nysan 99% daıyn.

«1 jáne 2 blok boıynsha ǵımarattardy seısmıkalyq kúsheıtý jumystary júrgizildi, ishki ınjenerlik jeliler aýystyryldy, ishki jáne syrtqy árleý jumystary aıaqtaldy. 3, 4, 5 blok boıynsha barlyq monolıtti jumys aıaqtaldy, ınjenerlik jeliler júrgizilip, qosyldy, ǵımarattyń shatyry men tereze bloktary ornatyldy, ishki árleý jumystary júrgizildi. 3, 4, 5 blokty syrtqy árleý, aýmaqty abattandyrý jáne jabdyqty retteý jumystary qolǵa alyndy»,- dep habarlady ákimdikten.

Nysandy oqý jylynyń basynda paıdalanýǵa berý kózdelip otyr.