Almaty ákimdigi turǵyn úıdi basqarýdyń jańa nysanyna kóshý tártibin túsindirdi
Natalya Zheldak atty jeli qoldanýshysynyń jazýynsha, turǵyndar úılerin múlik ıeleri birlestigi (MIB) nemese jeke seriktestikke (JS) aýystyrý máselesi boıynsha jınalys ótkizbekshi bolǵan. Biraq, jınalysqa turǵyndardyń kóbi kelmegen. Al Almatyda 1 shildege deıin barlyq turǵyn úı MIB nemese JS-qa aýysýy tıis.
Atalǵan másele boıynsha QazAqparat tilshisi ákimdikke saýal joldaǵan edi.
Almaty qalasy ákimdiginiń bergen jaýaby boıynsha «Turǵyn úı qatynastary týraly» zańǵa sáıkes, turǵyn úıdi basqarý nysanyn tańdaý týraly sheshim qabyldaý úshin turǵyndar kóppáterli turǵyn úıdiń páterleriniń, turǵyn emes úı-jaılarynyń menshik ıeleriniń jınalysyn ótkizip, kondomınıým obektisin saılaýǵa mindetti.
«Olar mynadaı formalar bolýy múmkin:
1) Múlik ıeleriniń birlestigi – kóppáterli bir turǵyn úıdiń páterleriniń, turǵyn emes úı-jaılarynyń menshik ıeleri qurǵan, kondomınıým obektisin basqarýdy júzege asyratyn, ony ustaýdy qarjylandyratyn jáne onyń saqtalýyn qamtamasyz etetin kommertsııalyq emes uıym bolyp tabylatyn zańdy tulǵa.
2) Kóppáterli turǵyn úıdiń jaı seriktestigi – qyzmetin QR azamattyq zańnamasyna sáıkes jasalǵan birlesken qyzmet týraly shart negizinde júzege asyrady.
Bul rette páterlerdiń, turǵyn emes úı-jaılardyń menshik ıeleri kondomınıým obektisin basqarý nysandaryn tańdaýda jáne ózgertýge erikti.
Sonymen qatar, kommýnaldyq qyzmet kórsetetin uıymdar tólem bolmaǵan, sondaı-aq, shartta belgilengen merzimde tolyq tólem bolmaǵan jaǵdaıda, qyzmetterdi tolyq nemese ishinara kórsetýdi toqtatady. Aıtý kerek, turǵyn úı quqyqtyq qatynastardan týyndaıtyn daýlardy Zańnyń 8-babyna sáıkes, sot sheshedi», - delinedi ákimdiktiń bergen jaýabynda.
Eske salsaq, buǵan deıin Almatydaǵy PIK jetekshileri MIB qyzmetine kedergi keltirip otyrǵanyn jazǵan edik.
https://kaz.inform.kz/news/almatydagy-pik-zhetekshileri-mib-kyzmetine-kedergi-keltirip-otyr_a3924036