Almaty ákimdigi taýyq jumyrtqasynyń shekti baǵasyn belgiledi
Qujatqa sáıkes, I sanatty taýyq jumyrtqasynyń on danasy úshin 487 teńge mólsherinde baǵa belgilenip otyr. Tıisti qaýly osy aıdyń aıaǵyna deıin jaramdy. Atalǵan shara naryqtaǵy ónimniń qunyn turaqtandyrýǵa jáne satýshylardyń baǵany negizsiz kóterýine jol bermeý úshin qolǵa alynyp otyr.
«Budan buryn Almatyda mundaı retteý mehanızmin qoldaný oń nátıje kórsetti. Ótken jyldyń sońynda qaraqumyq jarmasy men qantqa shekti baǵa belgileý qalada ónimniń bir kelisiniń ortasha qunyn sáıkesinshe 375 teńgeden 360 teńgege deıin jáne 256 teńgeden 252 teńgege deıin tómendetýge múmkindik berdi», – dep habarlady qala ákimdiginiń baspasóz qyzmeti.
Qaýly boıynsha bekitilgen baǵalardyń saqtalýyn Almaty kásipkerlik jáne ınvestıtsııalar basqarmasynyń mamandary aýdan ákimdikterimen birlesip baqylaıdy. Eger kásipkerler qaýlyǵa qulaq aspaı, baǵany kótergen bolsa aıyppul salynady. Atalǵan is-áreketter bir jyldyń ishinde qaıtalanǵan jaǵdaıda, 100 aılyq eseptik kórsetkishten (291 700 teńge) 200 aılyq eseptik kórsetkishke deıingi (583 400 teńge) mólsherde aıyppul túrindegi ákimshilik jaýapkershilikke tartylady.