Almaty ákimdigi nelikten asfalttyń dóńgelek ústinen tóselgenin túsindirdi
18:20, 11 Shilde 2022
ALMATY. QazAqparat – Jelide jańadan tóselgen asfalttyń astynda qalyp ketken dóńgelektiń fotosy paıda boldy. Bul sýret Aqbulaq yqsham aýdanyndaǵy jol jóndeý jumystarynan keıin túsirilgen, dep habarlaıdy QazAqparat tilshisi.
Almaty qalasy ákimdigi baspasóz qyzmetiniń málimetinshe, yqsham aýdandaǵy kósheniń birine asfalt tóseý kezinde turǵyndar ol jerde metall lıýgy baryn habarlaıdy. Alaıda, 0.6 metr tereńdiktegi qudyq jol negizin daıyndaý kezinde baıqalmaǵan.
«Turǵyndar lıýk ornalasqan jer belgili bolý úshin ústine dóńgelek qoıǵan. Kelesi kúni ol jer qazyldy. Keıin betondaý men asfalttaý arqyly qajetti deńgeıge kóterildi. Qazirgi ýaqytta tehnıkalyq qadaǵalaý mamandary men turǵyndar birlesip, basqa da lıýkterdi anyqtaý maqsatynda yqsham aýdandaǵy kóshelerdi qarap shyǵýǵa kiristi. Másele baqylaýda», - dep habarlady ákimdikten.