Almaty ákimdigi men farmatsevter dári-dármek máselesin sheshýge ýaǵdalasty

ALMATY. QazAqparat –Almaty ákimi Baqytjan Saǵyntaev Instagram -daǵy paraqshasynda dári tapshylyǵy problemasyn sheshý úshin farmkompanııalar men salalyq qaýymdastyq basshylarymen birneshe kezdesýler ótkizgenin málim etti, dep habarlaıdy QazAqparat tilshisi.

«Mamandardyń pikirinshe, dári-dármek tapshylyǵy áldebireýler usynǵan dárilermen emdelýdi jón kórgen turǵyndardyń dúrligýinen paıda bolǵan. Termometrlerdiń de tapshylyǵy oryn aldy. Bir aıǵa jetýi tıis 30 myń gradýsnık eki kúnniń ishinde satylyp, bitip qaldy. Baǵa da birden sharyqtaǵan», — dep jazdy qala ákimi.

Sonymen qatar, ol QR farmatsevtıkalyq qyzmetti qoldaý jáne damytý qaýymdastyǵy, megapolıstiń dárihanalar jelisi, dári jetkizýshiler jáne medıkamentterdi óndirýshilerimen memorandýmǵa qol qoıylǵanyn jetikizdi.

Osylaısha, qala dárihanalaryna áleýmettik mańyzy bar dárilerdiń 41 ataýynyń jedel túrde jetkizilýi qamtamasyz etiletin bolady. Memorandýmǵa Almaty qalasynyń Kásipkerlik jáne ınvestıtsııalar basqarmasy, Taýarlar men qyzmetterdiń sapasy men qaýipsizdigin baqylaý departamenti, QR farmatsevtıkalyq qyzmetti qoldaý jáne damytý qaýymdastyǵy, sonymen birge, megapolıstiń dárihanalar jelisi, dári jetkizýshiler jáne medıkamentterdi óndirýshileri qol qoıdy.

Memorandýmǵa sáıkes, dárihanalar Densaýlyq saqtaý mınıstriniń 2019 jyldyń 15 shildedegi buıryǵynda belgilengen baǵalardy ustanýlary kerek. Sonymen birge tapsyrysty jetkizýshiler, óndirýshiler jáne qala dárihanalary júıeli túrde dárige degen tapshylyqty retteý maqsatynda Almaty qalasynyń ákimdigine dárilerdiń bar-joqtyǵy, olardyń bir kúndegi satylymy, sonymen birge jaqyn arada jetkizilýi tıis dáriler týraly aqparat berip otyrýlary kerek.

Búgingi tańda memorandým aıasynda qala boıynsha 102 iri dárihananyń bary anyqtaldy, olarǵa áleýmettik mańyzdy dárilerdiń 41 ataýy jetkiziledi. Mundaı dárihanalar qalanyń árbir aýdanynda bar. Árbir 41 preparat boıynsha negizsiz dúrlikpeni boldyrmaý maqsatynda bir qolǵa satýǵa ruqsat etilgen mólsheri anyqtaldy.

Jalpy, qalany qajetti dárilermen jáne termometrııamen qamtamasyz etý máselesi sheshimin tapty. Dárilik quraldardy jetkizýshi iri kompanııalar «Paratsetamol», «Ibýprofen», «Efferalgan», «Aspırın», «Tamıflıý», «Ingavırın», «Azıtromıtsın» jáne «Sýmamed» dárileriniń kúndelikti jetkizilýin júzege asyrady.

Qalada qazir «Paratsetamoldyń» 240 000 danasy, «Ibýprofenniń» 187 000 danasy, «Efferalgannyń» 11 000 danasy, «Aspırınniń» 206 000, «Tamıflıýdiń» 40 000, «Azıtromıtsınniń» 160 000 danasy jáne «Sýmamedtiń» 10 000 danasy bar. Jaqyn kúnderi atalǵan medıkamentterdiń úlken kólemdegi qosymsha jetkizilimi kútilýde.

Sonymen birge, 29 maýsymnan bastap termometrlerdiń alǵashqy iri jetkizilimderi bastaldy – iri dárihana jelilerine 30 000 danasy tıelip, jóneltildi. Aldaǵy kúnderi qosymsha 780 000 dana termometr keledi dep kútilýde.