Almaty ákimdigi qyzmeti 2 aptaǵa toqtaıtyn mekemelerdiń tizimin jasaıdy
21:42, 02 Shilde 2020
ALMATY.QazAqparat – Epıdemıologııalyq jaǵdaıdy turaqtandyrý úshin aldaǵy 14 kúndik shekteýlerdi barynsha tıimdi júrgizý mańyzdy. Bul týraly Almaty qalasynyń ákimi Baqytjan Saǵyntaev Facebook-tegi paraqshasynda jazdy, dep habarlaıdy QazAqparat tilshisi.
«Koronavırýstyń taralýyna jol bermeý jónindegi qalalyq komıssııanyń otyrysynda qosymsha shekteý sharalaryn engizýge daıyndyq barysyn talqyladyq. Memlekettik komıssııanyń sheshimine sáıkes qyzmeti eki aptaǵa toqtatylatyn kásipkerlik sýbektilerdiń tizimin anyqtaımyz. Al qyzmetin jalǵastyratyn mekemeler úshin sanıtarlyq qaýipsizdik boıynsha qatań erejeler belgilenbek»,– dep jazdy ákim.
Sonymen qatar, ol epıdemıologııalyq jaǵdaıdy turaqtandyrý úshin aldaǵy 14 kúndik shekteýlerdi barynsha tıimdi júrgizý mańyzdy ekenin atap ótti.
«Syrqattaný men aýrýhanaǵa jatqyzý deńgeıiniń dınamıkasyna qaraı shekteý sharalaryn uzartý nemese toqtatý týraly sheshim qabyldanady. Bul bizdiń árqaısymyzǵa baılanysty», - dep tolyqtyrdy B.Saǵyntaev.