Almaty ákimdigi qostanaılyqtarǵa gýmanıtarlyq kómek jınaǵyn jarııalady

NUR-SULTAN. QazAqparat – Almatyda Qostanaı oblysyndaǵy órtten zardap shekkenderge gýmanıtarlyq kómek jınaý bastaldy. Qalalyq jastar saıasaty basqarmasy front-ofısiniń eriktileri memlekettik jastar saıasaty qorymen, kásipkerlik jáne ınvestıtsııalar basqarmasymen, sondaı-aq Almaty qalasynyń aýdandyq ákimdikterimen birlesip uıymdastyrdy, dep habarlaıdy QazAqparat shahar ákimdiginiń baspasóz qyzmetine silteme jasap.

«Qarajat pen qajetti azyq-túlik, kıim-keshek pen qurylys materıaldaryn jınaýǵa kásipkerler, aýdandyq ákimdikter qosyldy. Búgin Qostanaı oblysyna gýmanıtarlyq kómekpen tórt júk kóligi attanady. Biz negizgi azyq-túlik – sý, qant, maı, jarma, pechene, keptirilgen jemister jáne t.b., sondaı-aq eresekter men balalarǵa arnalǵan kıim, mektep kerek-jaraqtary, aıaq kıimder jınadyq», - dedi jastar saıasaty basqarmasynyń basshysy Qaıyrjan Meńdiǵalıev.

Gýmanıtarlyq kómek jınaý jáne eriktilerdi qabyldaý qalanyń barlyq segiz aýdanynda tańerteń erte júrgiziledi, jıynnyń bas shtaby Baıtursynov kóshesi, 22 k1 mekenjaıy boıynsha DEPO EVOLUTIONS PARK bolyp belgilendi. Azyq-túlik, uzaq merzimdi saqtaý ónimderi, dári-dármekter, gıgıena quraldary, kıim jáne tósek-oryn jabdyqtary qabyldanady.

«Qalalyq volonterlik uıymdardy biriktirdik. Jastar saıasaty basqarmasynyń front-ofısiniń eriktileri, sondaı-aq stýdentter qataryndaǵy Memlekettik jastar saıasaty qorynyń eriktileri tańerteńnen bastap gýmanıtarlyq kómek qabyldaý pýnktilerinde jumys istep jatyr. Megapolıs turǵyndary da shette qalǵan joq. Bizge kıimder, balalar taǵamdaryn ákeldi. Qazirgi ýaqytta eriktiler júk kólikterin Qostanaı oblysyna jónelte bastady», - dedi Almaty qalasynyń memlekettik jastar saıasaty qorynyń dırektory Ázız Kajdenbek.

Almaty jastar saıasaty basqarmasynyń basshylyǵy qala turǵyndaryn aktsııaǵa qosylýǵa jáne Qostanaı oblysynda zardap shekken otbasylarǵa kómektesýge shaqyrady.

Kómek kórsetýge, volonter bolýǵa nemese azyq-túlikpen qamtamasyz etýge nıettilerden uıymdastyrýshylar Almaty qalasynyń volonterler front-ofısiniń basshysy Nursultan Bolatulyna qońyraý shalýdy (8 707 438 77 33) suraıdy.

Sonymen qatar, almatylyq eriktiler órt ornyn qalpyna keltirý jumystaryna qatyspaq. Qostanaı oblysynda júk jınaý úshin arnaıy qoımalar uıymdastyryp, halyqqa kómekti taratý jumystaryn júrgizedi.

Eske salsaq, Qostanaı óńirinde órtten zardap shekken turǵyndarǵa kómek berýge arnalǵan biryńǵaı qoǵamdyq qor quryldy.