Almaty ákimdigi kommýnaldyq ótemaqy alatyn adamdardyń sanyn eki esege arttyrdy

ALMATY. QazAqparat – Almatyda kommýnaldyq ótemaqy 119 myń adamǵa beriletin boldy. Bul týraly onlaın brıfıng barysynda qalalyq Energotıimdilik jáne ınfraqurylymdyq damý basqarmasynyń basshysy Áset Masabaev aıtty, dep habarlaıdy QazAqparat tilshisi.

Bıyl 18 sáýirde QR Indýstrııa jáne ınfraqurylymdyq damý mınıstrligi Kommýnaldyq qyzmet kórsetýshilerge shyǵyndardy óteý erejesin bekitken bolatyn.

«Buǵan deıin qoldanylyp kelgen erejelerge sáıkes, ótinish bildirgen jáne jeke shoty bar mynadaı sanattaǵy adamdarǵa berilip keldi. 1-shi, 2-shi, 3-shi toptaǵy múgedekter, múgedek balalardy tárbıelep otyrǵan otbasylar, kópbalaly otbasylar, Uly Otan soǵysynyń múgedekteri men qatysýshylary olarǵa teńestirilgen adamdar, memlekettik nemese qoǵamdyq mindetterdi oryndaý, áskerı qyzmet atqarý kezinde, ǵarysh keńistigine ushýdy daıyndaý nemese júzege asyrý kezinde, adam ómirin qutqarý, quqyqtyq tártipti qorǵaý kezinde qaza tapqan adamdardyń otbasylary, eń tómengi jáne odan tómen zeınetaqy alatyn jalǵyzbasty zeınetkerler, ataýly áleýmettik kómek alatyn azamattar alýy tıis bolatyn. Atalǵan sanatqa jatatyn adamdardyń tizimin Áleýmettik ál-aýqat basqarmasy daıyndady. Sáýirde muqtaj jandar sany 62 myń bolǵan. Qazir bul kómekke muqtaj adamdar sany 119 myńǵa jetti. ıAǵnı, 2 esege ósti», - dedi Áset Masabaev.

Energotıimdilik basqarmasynyń baılanys ortalyǵynda 148 myń qońyraý tirkelgen. Onyń ishinde 17 505 ótinish maquldandy.

Buǵan deıin tek derbes shot muqtaj adamnyń basyna rásimdelgen jaǵdaıda ǵana beriletin bolǵan edi.

Óńirler men Almaty qalasy Erejege osy másele boıynsha ózgerister engizý jóninde usynystar berdi.

Bul ózgeris 2020 jyly 10 mamyrda engizildi.

Mınıstrliktiń ózgertilgen buıryǵynyń 6-tarmaǵyna sáıkes ózderiniń jeke shottary nemese ózderimen birge turatyn otbasy músheleriniń jeke shottary bolǵan kezde kommýnaldyq qyzmetter boıynsha ótemaqy alýǵa quqyly bolady.

«Bul jerde QR «Neke jáne otbasy týraly» kodekstiń 3-babynyń 1-tarmaqshasynda Qazaqstan Respýblıkasynyń neke-otbasy zańnamasy: otbasy músheleri: erli-zaıyptylar, ata-analar jáne olardyń balalary arasyndaǵy quqyqtar men mindetterdi, múliktik jáne jeke múliktik emes qatynastardy belgileıtini qarastyrylǵan. Osylaısha, Kodekste ata-anasy, erli-zaıyptylar, olardyń balalary otbasy músheleri bolyp tanylǵan, osy oraıda Erejede kommýnaldyq qyzmetter tólemderiniń ótelýi úshin muqtaj adamdarmen birge turatyn otbasy músheleri ótinish berýge quqyly dep kórsetiledi», - dedi spıker.