Almaty ákimdigi qoǵamdyq dárethana satyp alarda jemqorlyqqa jol berdi me

ALMATY. QazAqparat- Áleýmettik jelide Almaty ákimdigi qoǵamdyq dárethanalardy satyp alý kezinde iri kólemde aqsha jymqyrýy múmkin degen aqparat tarady. Osyǵan qatysty jergilikti bılik túsinik berdi, dep habarlaıdy QazAqparat tilshisi.

Áleýmettik jeligi aqparat taratqan avtordyń sózinshe, Almaty qalasy boıynsha sot saraptamalary ınstıtýtynyń taýarlyq zertteýi dárethanalardyń naryqtyq quny 4 785 000 teńge turatynyn kórsetken.

Al ákimdik olardy 7 979 954 teńgeden satyp alǵan.

«Olar qosymsha 20 sanıtarlyq-gıgıenalyq torap satyp aldy dep eseptegenniń ózinde kem degende bireý 63 899 080 teńgeni qaltasyna basyp qalǵan», - dep atap ótti jazba avtory.

Osyǵan baılanysty Almaty qalasynyń ákimdigi túsinik berdi.

«2021 jyly 30 naýryzda Almaty qalasy memlekettik aktıvter basqarmasy atynan memlekettik satyp alýdyń biryńǵaı uıymdastyrýshysy - memlekettik satyp alý portalynda QQS eseptemegende 178 571 428,57 teńge somasyna 20 dárethana modýlin daıyndaý jáne ornatý jumysyna konkýrs jarııalandy. Konkýrsqa Almaty qalasynyń týrızm basqarmasy tapsyrys berdi. Memlekettik satyp alý konkýrsyna 12 kompanııa qatysty. Nátıjesinde «Soft Engineering» JShS jeńiske jetti. Ol eń tómen baǵany usyndy - QQS eseptemegende 142 mln teńge. Memlekettik satyp alý týraly zańnyń 43-babyna sáıkes 2021 jyldyń maýsymynda jeńimpazben memlekettik satyp alý týraly tıisti shart jasaldy»,- dep jaýap berdi ákimdikten.