Almaty ákimdigi «Qaırat» FK-daǵy óz úlesin satýǵa shyǵardy

ALMATY. QazAqparat - «Qaırat» fýtbol klýbynyń 30 paıyz úleskeri Almaty qalasy ákimdigi ózindegi ıeligin satýǵa shyǵardy, dep habarlaıdy QazAqparat tilshisi.

Elektrondy saýda alańy saıtynda ákimdik aýktsıon arqyly óz úlesin satatynyn habarlaǵan. Aýktsıon baǵany kóterý júıesi arqyly satylmaq. Ákimdik qoıyp otyrǵan bastapqy baǵa - 2,03 mlrd teńge.

«Qaırat» FK-nyń memlekettik 30 paıyzy jekeshelendirý baǵdarlamasy aıasynda satylymǵa shyǵaryldy. Fýtbol klýbyna jeke múlikter de qosylǵan», dep bul aqparatty Almatynyń Qarjy basqarmasy «QazAqparat» tilshisine rastady.

Buǵan deıin belgili bolǵandaı, klýbtyń 70 paıyz úlesi «Globex Energy FZE» jeke kompanııasyna tıesili. Alaıda, ol kompanııa ákimdikten qalǵan 30 paıyzdy satyp almaǵan bolatyn. Atalǵan basqarmadan sonyń sebebin suradyq.

«JShS-lar týraly Zańǵa sáıkes, basty paket ıesinde jekeshelendirý kezinde memlekette qalǵan úlesti 100 paıyz satyp alý quqyǵy joq. Biraq, olar aýktsıonǵa ózgelermen teń dárejede qatysa alady», - dedi Almaty ákimdigi Qarjy basqarmasynan.

Elektrondy saýda alańy saıtyndaǵy habarlamanyń astynda klýbtyń qarjylyq esebi berilgen. 20 shildedegi jaǵdaı boıynsha klýb kirisi - 2,3 mlrd teńge, shyǵyny - 4,4 mlrd teńge. Jyl basynan beri taza shyǵyny - 2,1 mlrd teńge.

Qarjy basqarmasynan memleket óz úlesin satqannan keıin, klýbtyń qarjylyq esebi qanshalyqty ashyq bolatynyn suradyq. 

«Klýbtyń basty 70 paıyz paketi kópten beri jeke kompanııa úlesinde boldy. Sondyqtan, biz sońǵy jyldary olardyń klýb saıasatyna kóp yqpal ete alǵan joqpyz», - dedi atalǵan basqarmadan.

Klýbtyń medıa-ofıtseri Baǵyjan Ábýov «QazAqparat» tilshisine klýbtyń jekeshelendirý aldynda turǵanyn biletinin, biraq bul másele boıynsha pikir bildirýden bas tartatynyn aıtty.

Aýktsıon 18 tamyzǵa belgilengen. Sol kúni qansha satyp alýshy tirkelip, qanshaǵa satylǵany belgili bolady.