Almaty ákimdigi dızeldik otyn máselesin sheshýde

ALMATY. QazAqparat- Almaty qalasynyń ákimdigi Energetıka mınıstrligimen birlesip, iri janarmaı quıý stantsııalarynyń jelilerine dızeldik otynnyń úzdiksiz jetkizilýin qamtamasyz etýge kómek kórsetip jatyr, dep habarlaıdy QazAqparat tilshisi.

Megapolıstegi janarmaı quıý stantsııalaryna dızeldik otyn úsh qazaqstandyq munaı óńdeý zaýytynan (Pavlodar, Atyraý, Shymkent) jetkiziledi.

«Almaty qalasynyń Kásipkerlik jáne ınvestıtsııalar basqarmasy kóterme jetkizýshilermen birlesip, turǵyndardy qajetti kólemde dızeldik otynmen qamtamasyz etý máselesin pysyqtaýda. Dúrbeleńdi boldyrmaý maqsatynda munaı bazalary men janarmaı quıý beketterindegi dızeldik otynnyń kelisim-sharttyq kólemderiniń qorlaryna turaqty monıtorıng júrgizilýde, jol boıynda dızeldik otynmen qamtamasyz etýde irkilisterdi boldyrmaý úshin «QTJ» UK» AQ-men kelisim bar. Megapolısti dızeldik otynmen qamtamasyz etý máselesi erekshe baqylaýda», - dep habarlady ákimdikten.

Qalada tutyný kóleminiń ósýi basqa aımaqtardan keletin aýyr tranzıttik kólik ıeleriniń dızeldik otynǵa suranysynyń artýyna baılanysty oryn alǵan.

Búginde Almatyda 220 janarmaı quıý beketi jumys isteıdi. Onyń 80 protsenti alty iri kompanııaǵa tıesili.

Foto: economictimes.indiatimes.com