Almaty ákimdigi ata-analardy balalaryn onlaın oqytýǵa shaqyrdy
«Qurmetti ata-analar! KVI jaǵdaılarynyń tirkelýiniń ulǵaıýyna baılanysty Almaty ákimdigi múmkindiginshe balalardy úıde onlaın oqýda qaldyrýdy suraıdy. Sonymen birge, mundaı múmkindigi joq ata-analar úshin mektepte joǵary sanıtarlyq-epıdemıologııalyq talaptarǵa sáıkes aralas oqytý jalǵasatyndyǵy týraly habarlaımyz. Barlyq mektepter dezınfektsııalyq quraldarmen 100% qamtamasyz etilgen»,- dep málim etti Almaty qalasynyń Bilim basqarmasy.
Aıta ketý kerek, KVI-ge qatysty epıdemıologııalyq ahýal Almatyda 2 naýryzdan bastap baǵalaý matrıtsasynyń «sary» aımaǵyna, al 10 naýryzdan bastap «qyzyl» aımaǵyna ótti.
Epıdemııa bastalǵannan beri koronavırýstyq ınfektsııanyń 27 361 jaǵdaıy (100 myń turǵynǵa shaqqanda 1 344,7), sondaı-aq 1666 koronavırýstyq pnevmonııa tirkeldi.
KVI aýrýynyń ósýi 3 naýryzda bastaldy. Sol kezde táýligine 121 aýrý tirkelip, 13 naýryzda kúnine 360 jaǵdaıǵa jetti.
Sońǵy 7 kúnde aýrý deńgeıi 61,2 qurady, reprodýktıvti sany R - 1,3.
Mektepterde 1-5 synyptardan bastap oqýdyń bastalýyna baılanysty 14 jasqa deıingi balalar arasynda ınfektsııa 22,4%-ǵa ósken.