Almaty ákimdigi apatty úıdi buzýdy talap etken turǵyndarǵa jaýap berdi

ALMATY. QazAqparat- Almatylyq turǵyn apatty úıdi buzý týraly talabyn plakatqa jazyp, terezesine ilip qoıǵan. Qala ákimdigi osy máselege qatysty túsinik berdi, dep habarlaıdy QazAqparat tilshisi.

Buǵan deıin áleýmettik jelide tozyǵy jetken úı turǵyndarynyń biri terezesine úıdi buzýdy talap etken plakat ilip qoıǵan sýret paıda bolǵan edi. Sonymen qatar, habarlamada qalalyq ákimdiktiń buzýǵa ruqsat bermeıtini týraly jazylǵan.

Almaty ákimdigi jazbaǵa qatysty túsinik berdi.

«Bizdi tez arada buzyńyzdar» degen belgisi bar úı Shevchenko kóshesi, 113 mekenjaıda ornalasqan jáne Almaty qalasyndaǵy eski úıler tizimine kiredi.

Renovatsııa aıasynda (Almaly aýdany ákiminiń apparatymen) atalǵan ýchaskege áleýetti ınvestor – «VEK korporatsııasy» qurylys kompanııasy tartyldy. Qazirgi kezde qurylys salýshy men turǵyndar arasynda satyp alý sharttary boıynsha kelissózder júrgizilýde.

«Qurylys kompanııasynan usynylǵan qujattardyń sáıkes kelmeýi saldarynan qurylystardy súrý boıynsha jumystar keshenin júrgizýge sheshim berilmeıtin boldy. Eskertýler joıylǵan jaǵdaıda másele zańǵa sáıkes qaralatyn bolady»,- dep habarlady ákimdikten.