Almaty ákimdigi «Almaty qala jaryq» kásipornyn jekeshelendirý isi boıynsha sotqa aryz berdi
Qalalyq prokýratýranyń taratqan málimetine sáıkes, Almaty qalasy ákimdiginiń 2021 jyldyń qazan aıyndaǵy qaýlysymen «Almaty qala jaryq» ShJQ MKK-ni jekeshelendirý jóninde sheshim qabyldanǵan bolatyn.
Almaty qalasy memlekettik aktıvter basqarmasy 2021 jyldyń qarasha aıyndaǵy memlekettik múlik tiziliminiń veb-portalynda 14 mlrd 835 mln teńge bastapqy baǵa usynysymen («BıznesPartnerKonsalt» JShS baǵalaý uıymy) alǵashqy saýda-sattyqty ótkizetini týraly jarııalaǵan.
Qatysýǵa ótinimderdiń bolmaýyna baılanysty saýda-sattyq eki ret ótpedi dep tanyldy.
2021 jyldyń jeltoqsan aıyndaǵy úshinshi saýda-sattyq nátıjeleri boıynsha 4 mlrd 660 mln 20 myń teńge mólsherindegi baǵa usynysymen (jalǵyz ótinim) «ABM Group.com» JShS jeńimpaz bolyp jarııalandy. Keıinnen jeńimpazben satyp alý-satý sharty jasaldy.
«Taýar naryǵy básekelestiginiń jaı-kúıin taldaý barysynda Almaty qalasy boıynsha Básekelestikti qorǵaý jáne damytý departamenti «Memlekettik múlik týraly» QR zańynyń normalaryn, Jekeshelendirý obektilerin satý erejelerin jáne Almaty qalasy ákimdiginiń áreketterinde Kásipkerlik kodeksin buzý faktilerin anyqtady. Osyǵan baılanysty, qalalyq prokýratýranyń zańdylyqty buzýshylyqty joıý týraly usynysy men joǵaryda atalǵan departamenttiń habarlamasy negizinde ákimdik «Almaty Qala Jaryq» ShJQ MKK satý boıynsha satyp alý-satý shartyn buzý jáne jaramsyz dep taný týraly Almaty qalasynyń mamandandyrylǵan aýdanaralyq ekonomıkalyq sotyna talap aryz berdi», - delinedi prokýratýranyń habarlamasynda.
Eske salsaq, Almaty ákimdigi «Almaty qala jaryq» kásipornyn qala menshigine qaıtarý sharalaryn júzege asyryp jatqanyn jazǵanbyz.