Almaty ákimdigi «Almaty InjStroı» kompanııasyn jaýapqa tartpaq

ALMATY. QazAqparat - Almatyda magıstraldy sý qubyryndaǵy turaqty avarııalardyń saldarynan «Nurly dala» turǵyn úı kesheniniń turǵyndary aýyz sýsyz qaldy. Bul týraly Almaty qalasynyń ákimi Erbolat Dosaev Naýryzbaı aýdanynyń turǵyndarymen kezdesýi kezinde aıtty, dep habarlaıdy QazAqparat tilshisi.

Qala ákiminiń aıtýynsha, máseleniń tamyry tereńde jatyr.

«2019 jyly merdiger uıym «Almaty InjStroı» jańa sý qubyr jelilerin júrgizý kezinde bolat qubyrlardy dıametri 600 mıllımetr (uzyndyǵy 5 km) shyny-plastık qubyrǵa aýystyrǵan. Osydan soń sý jelisinde apatty jaǵdaılar kóbeıip ketti. 2019 jyldan bastap bul ýchaskede 28 avarııa tirkeldi (bıyl 15 avarııa). Atalǵan máseleni sheshý úshin Almaty qalasynyń ákimdigi ýaqytsha sý qubyryn júrgizý týraly sheshim qabyldady»,- dedi Erbolat Dosaev.

Bul rette qala ákiminiń tapsyrmasymen 19-shy qazanda merdiger uıym Qazaq Stroy «Nurly dala» turǵyn úı keshenin turaqty sýmen jabdyqtaý úshin uzyndyǵy 400 metr, dıametri 325 mıllımetr ýaqytsha sý qubyryn júrgizýge kiristi. Jumystar qarasha aıynyń sońyna deıin aıaqtalady dep kútilýde.

«Bul maqsatqa Almaty qalasy ákimdiginiń rezervinen 102 mln teńge bólindi. Sondaı-aq, merdiger uıym «Almaty InjStroıǵa» qatysty tıisti materıaldar qylmystyq is qozǵaý úshin zań qorǵaý organdaryna berildi»,- dedi Almaty qalasynyń ákimi Erbolat Dosaev.