Almaty ákimdigi 21 mamyrda jer máselesi boıynsha narazylyq aktsııasyn ótkizýge ruqsat bermedi
«Sońǵy ýaqytta jer máselesine baılanysty túrli alyp-qashpa áńgimeler beleń alyp otyr. Keıbir jeke tulǵalar Qazaqstanda jerdiń sheteldikterge satylatyndyǵy jaıynda jalǵan aqparat taratyp, azamattardy arandatyp, aǵymdaǵy jylǵy 21 mamyrda ruqsat etilmegen narazylyq aktsııalaryna shaqyryp júr», - delingen habarlamada.
Elbasy QR Jer kodeksine engizilgen tórt túzetýdiń kúshine enýine moratorıı jarııalaǵany belgili. Sonymen qatar, Memleket basshysynyń tapsyrmasy boıynsha QR Jer kodeksiniń normalaryn talqylaý men túsindirý jáne usynymdar ázirleý úshin jer reformasy jónindegi Komıssııa quryldy. Ol qazir jumys istep jatyr.
Búgin, Almaty qalasynyń ákimdigi aǵymdaǵy jylǵy 21 mamyrda jer máselesi boıynsha narazylyq aktsııasyn ótkizýge qatysty kelip túsken ótinishterdi qarap, aktsııany ótkizýge ruqsat bermedi.
Osyǵan baılanysty Almaty qalasynyń prokýrory Berik Asylov turǵyndar men áleýmettik jelilerdi qoldanýshylardy zańnama talaptaryn buzýǵa jol bermeýge shaqyrdy.
«Ruqsat etilmegen narazylyq aktsııalaryn ótkizýge shaqyrǵan jáne oǵan qatysqan, sonymen qatar, áleýmettik jáne ulttyq arazdyqty qozdyratyn belgileri bar jarııalanymdardy ornalastyrǵan nemese taratqan tulǵalardyń QR Ákimshilik quqyq buzýshylyq kodeksiniń 488-baby men QR Qylmystyq Kodeksiniń 174, 274 jáne 400- baptary boıynsha ákimshilik jáne qylmystyq jaýapkershilikke tartylatyndyǵyn eskertemin», - dedi B. Asylov.