Almaty ákimdigi 101 jańa avtobýs satyp aldy

ALMATY. QazAqparat - Búgin Medeý aýdany turǵyndarymen kezdesken Almaty ákimi Erbolat Dosaev qoǵamdyq kólikterdi jańartý jumystarymen bólisti, dep habarlaıdy QazAqparat tilshisi.

«Megapolıste 9 marshrýtty jańartý úshin 101 jańa avtobýs satyp alyndy. Qazirgi tańda 4 marshrýttyń avtobýstary jańartyldy. Atap aıtar bolsam, №69 – 18 avtobýs, №201 – 24 avtobýs, №12 – 16 avtobýs, №71 – 10 avtobýs. Sondaı-aq jyl sońyna deıin taǵy 5 marshrýttyń avtobýstary jańartylady. Olar №5, 5a, 5b, 5v – 8 avtobýs jáne №205 – 25 avtobýs», - dedi megapolıs basshysy.
Budan bólek, bıyl qosymsha №100 marshrýt iske qosylyp, jelige 34 avtobýs shyǵaryldy. Kelesi jyly Qaldaıaqov kóshesinen «Geolog» baý-baqsha seriktestigine deıin 1 jańa marshrýt qatynaı bastaıdy.

Buǵan deıin Erbolat Dosaev Túrksib aýdany turǵyndarymen kezdesýde qoǵamdyq kólikter jańartylyp jatqanyn, aldaǵy ýaqytta 300 avtobýs satyp alynatynyn aıtqan bolatyn.