Almaty akademııasynda uıymdasqan qylmysqa qarsy is-qımyl boıynsha mamandardy daıarlaý ortalyǵy ashyldy
Jańadan ashylǵan uıymdasqan qylmysqa qarsy is-qımyl boıynsha mamandardy daıarlaý ortalyǵy ishki ister mınıstri Marat Ahmetjanovtyń tapsyrmasy boıynsha ashylǵan. Onda polıtseılerge akademııanyń bilikti professorlyq-oqytýshy quramy atalmysh baǵyttaǵy jumystyń daǵdylary men erekshelikterin úıretetin bolady. Atap aıtqanda, elimizdiń ár óńirlerinen uıymdasqan qylmystarǵa qarsy is-qımyl boıynsha polıtsııa mamandary biliktilikti arttyrý kýrstarynan ótedi. Oqytý ortalyǵynyń basty maqsattarynyń biri – uıymdasqan qylmysqa qarsy kúres júrgizý jumysynda polıtseılerdiń kásibılikterin arttyrý.
ІІM uıymdasqan qylmysqa qarsy kúres departamentiniń bastyǵy Qanat Nurmaǵambetov atap ótkendeı, respýblıka boıynsha túrli qylmystyq toptar men elementterdi quryqtaýǵa, olardyń aldyn alý men jolyn kesý baǵytynda naqty jumystar atqarylýda. Atalmysh ortalyq jedel ýákil qyzmetkerlerdiń kásibıligi men bilimin arttyrýǵa múmkindik beredi. Іs-sharaǵa sondaı-aq Almaty qalasy polıtsııa departamentiniń bastyǵy Arystanǵanı Zapparov jáne QR ІІM Almaty akademııasynyń bastyǵy Aıdar Saıtbekov qatysty.
Ashylý saltanatynan soń, ortalyqta kóshi-qon boıynsha Halyqaralyq uıym mıssııasynyń jáne Orta Azııalyq óńirlik aqparattyq úılestirý ortalyǵynyń ókilderiniń qatysýymen «Uıymdasqan qylmysqa qarsy kúres» taqyrybynda dóńgelek ústel ótkizildi. Jıynda aldaǵy ýaqyttaǵy jumystar jospary men oqytý formasyn jetildirý týraly máseleler talqylandy.