Almaty 2026 jylǵy Qysqy Olımpıada oıyndaryn ótkizýge usynys berdi me - Baıbektiń jaýaby
«Ózderińiz biletindeı, biz jyldyń basynda Qysqy Ýnıversıadany óte nátıjeli ótkizdik. Ýnıversıada - Olımpıadanyń aldyndaǵy óte aýqymdy sporttyq saıys. Oǵan barlyǵy joǵary baǵa berdi. Bizden keıin Taıpeıde bolǵan otyrysta «Almaty - Ýnıversıadany tarıhta eń keremet ótkizgen qala» bolǵany týraly aıtyldy. Sondyqtan, bizdiń saıys ótkizý tájirıbemizdi qazirgi tańda barlyǵy zerttep jatyr», - deıdi qala ákimi.
Onyń aıtýynsha, Almatyda qysqy sport túrleri úshin ınfraqurylymnyń bári daıyn.
«Sol sebepti, múmkin Almaty qysqy Olımpıadany ótkizýi kerek degendi aıtyp jatqan kórinedi. Biraq, men sizderge resmı túrde aıta alamyn. Almaty qalasy 2026 jyly Qysqy Olımpıada oıyndaryn ótkizý týraly ótinim bergen joq. Biraq, bizden «sizderde bári daıyn ǵoı, ótinim beresizder me» dep surap jatyr. Bizdiń A+ ulttyq kompanııasy ýnıversıadanyń ashylýy men jabylýyn keremet jaqsy jasaǵan. Sheteldikter kelgen kezde «bul sharany kimder osylaı uıymdastyrdy, amerıkalyqtar ma» dep surady. Biz «joq, ózimizdiń qazaq kompanııasy» dep jaýap berdik. Sondyqtan, sheteldik meımandar saıystyń ashylýy men jabylýy Olımpıada oıyndarynan kem bolmaǵanyn aıtyp jatyr. Jalpy, EKSPO, Ýnıversıada sekildi sharalardy ótkizý memleketke kóp tájirıbe beredi. Kezinde Olımpıadany ótkizgen Tokıo ınfraqurylymyn sol shara arqyly kóterip alǵan. Qaıtalap aıtarym - Almaty qalasy bul turǵyda eshqandaı usynys bergen joq», - dep túıdi Baýyrjan Baıbek.