«Almaty-1-Shý» temir jol ýchaskesiniń ekinshi jelisiniń qurylysy bastaldy

ASTANA. QazAqparat - «Nurly jol - bolashaqqa bastar jol» jańa ekonomıkalyq saıasat aıasynda «Almaty-1-Shý» temir jol ýchaskesiniń ekinshi jelisiniń qurylysyn júrgizý jáne elektrlendirý bastaldy, dep habarlaıdy «QTJ» UK» AQ baspasóz qyzmetinen.

Qurylystyń ashylý saltanatyna QR Investıtsııalar jáne damý birinshi vıtse-mınıstri Jeńis Qasymbek, «QTJ» UK» AQ prezıdenti Asqar Mámın, Jambyl oblysynyń ákimi Kárim Kókirekbaev qatysty.

Burynnan kele jatqan 306 shaqyrymǵa sozylǵan temir jol jelisinde poıyz qozǵalysy tasqyndaı túsýde. Bul jańa ekinshi temir jol jelisin salý arqyly joldyń ótkizý qabileti qazirgi 25 mıllıon tonnadan 80 mıllıon tonnaǵa deıin artady. Sonymen qatar júk poıyzdarynyń ýaqyty da eki esege qysqarady.

Jobany júzege asyrý barysynda basty 110 shaqyrymdyq jol salynady. Basty joldyń boıynda 92 dana ınjenerlik qurylǵylar bolsa, 22 temir jol kópiri, eki jol ótkeli salynady. Qurylys bastalǵan kezde onda 1500-den astam jumys orny qamtylady.

Sońǵy jyldary «Astana-Almaty» temir jol jelisiniń joǵarǵy qabaty birshama jańǵyrtyldy. Ol arqyly «Tulpar» júrdek jolaýshylar poıyzynyń qozǵalys jyldamdyǵy arta tústi.

Memlekettik mańyzy zor jobany júzege asyrý el ekonomıkasyna zor serpin beretin bolady.