Almatynyń Jetisý aýdany ákiminiń orynbasary para alǵany úshin 6 jylǵa sottaldy
Sotta Almaty qalasy Jetisý aýdany ákiminiń apparaty men «K» JShS arasynda (dırektori B.) saıabaqtardaǵy jasyl jelekterdi kútip-ustaý boıynsha memlekettik satyp alý týraly shart jasalǵany anyqtaldy.
Jasyl alqaptardy tekserý kezinde Jetisý aýdany ákiminiń orynbasary R. oryndalǵan jumys aktileri men jumystardyń quny týraly aktige kedergisiz qol qoıýy úshin deldal arqyly para alý nıeti týyndaǵan. Óz kezeginde B. bul aqparatty JShS quryltaıshysyna habarlaǵan. Osylaısha, R. memlekettik fýnktsııalardy oryndaýǵa ýákiletti tulǵa bola tura, deldal B. arqyly para berýshi M-dan (JShS quryltaıshysy) óziniń qyzmettik ókilettigi sheginde áreket jasaǵany úshin 13 785 000 teńge kóleminde para alǵan.
Sottalýshylar óz kinálaryn tolyq moıyndady. Prokýror R. men M.-ny 6 jylǵa bas bostandyǵynan aıyrýdy surady. Sottalýshy B-ny 1,6 jylǵa bas bostandyǵynan aıyrýdy surady.
«Sot úkimimen sottalýshylar R. jáne M. para alý jáne para bergeni úshin kináli dep tanylyp, ár qaısysyna 6 jylǵa bas bostandyǵynan aıyrý jazasy taǵaıyndalyp, ómir boıyna memlekettik qyzmette laýazymdardy atqarý quqyǵynan aıyryldy. Sottalýshy B. para berýge deldaldyq tanytqany úshin kináli dep tanylyp, 1 jyl 6 aıǵa bas bostandyǵynan aıyrý jazasy taǵaıyndalyp, ómir boıyna memlekettik qyzmette laýazymdardy atqarý quqyǵynan aıyryldy.
Sottalýshylardyń shyn nıetpen ókiný, kinásin moıyndaý, kámeletke tolmaǵan balalarynyń bolýy jáne buryn sottylyǵy bolmaýy jaýaptylyqty jeńildetetin mán-jaılar retinde tanyldy. Jaýaptylyqty aýyrlatatyn mán-jaılar joq», - dep habarlady Almaty qalasy Jetisý aýdanynyń №2 aýdandyq sotynyń baspasóz qyzmeti.
Úkim zańdy kúshine engen joq.
Eske salaıyq, buǵan deıin Almaty qalasy Jetisý aýdany ákiminiń orynbasary iri kólemde para aldy dep aıyptalǵan edi.