Almatynyń ortalyǵynda jańa skver paıda bolady

<p>ALMATY. KAZINFORM - Almatyda turǵyndardyń ótinishi boıynsha jańa skver paıda bolady.</p>

Qala basshysy Erbolat Dosaev jergilikti turǵyndardyń ótinishi boıynsha Raıymbek – Seıfýllın - Tórequlov – Muratbaev kósheleriniń mańyndaǵy qıraǵan nysandardyń ornyna jańa qoǵamdyq keńistik qurýdy tapsyrdy.

«Altyn Sapa ALM» JShS ınvestory Seıfýllın dańǵyly boıyndaǵy eki eski turǵyn úıdi jáne burynǵy tergeý ızolıatory ǵımaratyn buzǵan. Áleýmettik jaýapkershilik aıasynda ınvestor óz esebinen Seıfýllın dańǵyly men Mámetova kóshesiniń qıylysynda aýdany 0,30 ga jańa skverdi abattandyrady. 

Foto: Almaty ákimdigi

Almaly aýdanynyń ákimi Arman Shamshın qazirgi ýaqytta skver paıda bolatyn ýchaskede qalanyń jer qatynastary basqarmasy 35 menshik ıesiniń 16 - nan jyljymaıtyn múlik satyp alǵanyn atap ótti.

Qurylys jumystary jyljymaıtyn múlik barlyq menshik ıelerinen satyp alynǵannan keıin osy jyldyń qazan aıyna josparlanǵan.

Shahar basshysy belgilengen josparǵa sáıkes jumysty jalǵastyrýdy tapsyrdy.

Aıta keteıik, Almatyda Esentaı, Úlken Almaty ózenderiniń boıyndaǵy jaǵalaýlarǵa rekonstrýktsııa júrgiziledi.

Pýshkın kóshesi boıymen Gogol kóshesinen Raıymbek batyr dańǵylyna deıingi uzyndyǵy 1,1 km jaıaý júrginshiler aımaǵyn abattandyrý josparda.