Almatynyń Neke saraıy nelikten qaraýsyz qaldy
Talaı otbasy shańyraq kóterip, baqyt pen shattyqtyń mekeni bolǵan ǵımarat 1971 jyly salynǵan. Almaty belgileriniń birine aınalǵan nysannyń sáýletshileri – Qazaqstannyń eńbek sińirgen sáýletshisi Malbaǵar Meńdiqulov pen Aleksandr Leppık.
Neke saraıynyń syrtynda onyń qysqasha tarıhy men ǵımarattyń memleket qorǵaýynda ekeni jazylǵan. Alaıda búgingi kúni nysannyń symbatty kelbeti buzyla bastaǵan. Biraz tusta ǵımarattyń qasbeti úgitilip qulaǵan, aınalysyndaǵy baspaldaqtar synǵan. Saraı aýmaǵynda qalyń shóp ósip, tipti nysanǵa keshki ýaqytta jaryq túsiretin quraldardyń birin jaýyp qalǵan.
Qaladaǵy tarıhı ǵımarattyń nashar jaǵdaıyna baılanysty Almaty ákimdigine saýal joldadyq. Ákimdiktiń baspasóz qyzmeti 2016 jyly Neke saraıy «Altyn dán Qazaqstan» kompanııasyna 20 jylǵa senimgerlik basqarýǵa berilgenin, alaıda artylǵan mindetterdiń tolyq oryndalmaýynan shart sot sheshimimen buzylǵanyn habarlady.
– Senimgerlik basqarýshy mindettemelerdi tolyq kólemde oryndamaǵandyqtan, Almaty qalasynyń ákimdigi senimgerlik basqarý shartyn merziminen buryn buzý týraly sheshim qabyldady. Kelisimshartty buzý zańdy tártipte júrgizildi. Almaty qalalyq sotynyń qaýlysymen sheshim zańdy kúshine endi. Nysan Almaty qalasy ákimdiginiń basqarmasynda qalady, nysandy odan ári paıdalaný máselesi pysyqtalyp jatyr, - dep habarlady ákimdikten.
Sondaı-aq shahar basshylyǵy «Tarıhı-mádenı mura obektilerin qorǵaý jáne paıdalaný týraly» Qazaqstan Respýblıkasynyń Zańyna sáıkes Neke saraıynyń aýmaǵy abattandyrylatynyn málimdedi. Alaıda jumystardyń qashan bastalatyny týraly naqty málimet berilgen joq.
Eske salaıyq, Almatyda beıbit jıyndar men sherýler ótkizý oryndary ózgerdi.