Almatynyń eki aýdanynda eki kún gaz bolmaıdy

<p>22-24 qazan aralyǵynda Bostandyq jáne Almaly aýdandarynda ýaqytsha gaz berý toqtatylady, dep habarlaıdy Kazinform.&nbsp;</p>

«QazTransGaz Aımaq» AQ baspasóz qyzmetiniń málimetinshe, ADK saýda, oıyn-saýyq ortalyǵynyń aýmaǵynda gaz qubyryn jóndeýge baılanysty birqatar turǵyn úıler men jeke sektorǵa gaz berý toqtatylady.

Atap aıtqanda, Tóle bı – Rozybaqıev – Saıran kóli – Jandosov kósheleriniń boıyndaǵy 2975 jeke sektor, 203 ujymdyq sektor jáne 21 kommýnaldyq-turmystyq kásiporyn ortalyq gazdan ajyratylady.

Josparda tómen qysymdy D-325 mm jerasty gaz qubyrynda gazdy úzdiksiz jáne apatsyz berý úshin apatty gaz qudyǵyn aýystyrý jumysy tur.

«Turǵyndardan gaz krandaryn jabýdy, «Intergaz Ortalyq Azııa» AQ OMG Almaty gaz sharýashylyǵy qyzmetkerleri júrgizetin jumystardy aıaqtaǵanǵa deıin ashpaýlaryn ótinemiz», - dep habarlady «QazTransGaz Aımaq» AQ fılıalynyń baspasóz qyzmeti.