Almatynyń aınalasy alqyzyl gúlge malynyp tur
Almatynyń bıylǵy kóktemi jańbyrly bolyp turǵandyqtan, qalanyń aınalasy alqyzyl gúlge malynyp tur. Óziniń ádemiligimen kórgen jandy baýrap alatyn gúlder dál qazirgi sátte alystan menmundalap tur.
Tabıǵattyń tamashasyn kórip, ony sýretke túsirmeý múmkin emes. Ásirese, fotograftar men vıdeograftar bul kórinisti qalt jibermeıdi.
Qyzǵaldaq alqabyna Kazinform fototilshiside baryp qaıtty.
Al, tanymal vıdeograf Dastan Muhamedrahym óziniń áleýmettik jelidegi paraqshasyna qyzǵaldaqtardyń vıdeosyn jarııalady.
Aıtýynsha, ol qyzǵaldaqtardy tańǵy saǵat tórtte túsirgen.
«Bul vıdeony tańǵy saǵat 4 pen 5 arasynda túsirdim. Qyzaryp endi atyp kele jatqan tań shapaǵymen túsirý úshin erte bardym. Bul Almaty men Uzynaǵash tas jolynyń boıy. Vıdeoǵa qarasańyzdar shóp meniń belimnen asyp tur. Óte qalyń. Maǵan júgirý de ońaı bolǵan joq. Negizi Almatynyń mańaıynda qyzǵaldaq óte kóp. Ádemi», - dedi ol.
Ókinishke qaraı, gúlderdiń qulpyryp turatyn shaǵy uzaqqa sozylmaıdy. Bári de aýa raıyna baılanysty.