Almatynyń ardagerler qozǵalysy jas urpaqty tárbıeleýde sheshýshi ról atqarady - Aqan Bıjanov

<p>ALMATY. KAZINFORM &ndash; Merekeniń máni, qazirgi urpaq bostandyq pen beıbit aspan úshin jandary qurban bolǵandardyń erligin umytpaı, este saqtaýynda.Bul týraly óńirlik kommýnıkatsııalar qyzmetinde ótken baspasóz máslıhatynda Almaty qalalyq ardagerler keńesiniń tóraǵasy Aqan Bıjanov aıtty.</p>

Spıkerdiń sózinshe, bıyl Almatyda Jeńis kúni joǵary deńgeıde uıymdastyrylady. Ol maıdanǵa 1,2 mıllıonnan astam qazaqstandyq shaqyrylǵanyn eske saldy.

«Bul merekeni, Jeńis kúnin kózge jas almaı eske alý múmkin emes. Bul bizge jeńis ákelgen Uly Otan soǵysynyń qatysýshylaryn eske alyp, qurmetteý. Soǵys jyldarynda Almatyda birneshe brıgada quryldy. Máskeý mańyndaǵy Dýbosekovo razezinde general Panfılovtyń basshylyǵymen 316-shy atqyshtar dıvızııasynyń óshpes erligi jáne 28 Panfılov kúzetshileriniń janqııarlyq batyldyǵy men batyrlyǵy eshqashan umytylmaıdy. Soǵys jyldarynda myńdaǵan adamdar, qazaqstandyqtar tylda eńbek etti. Olardyń erligi óshpeıdi jáne ol bizdiń halyqtarymyzdyń jadynda qalady», - dedi Aqan Bıjanov.

Aıtýynsha, Almatynyń ardagerler qozǵalysy jas urpaqty tárbıeleýde sheshýshi ról atqarady. Sondyqtan Jeńis kúnine arnalǵan barlyq is-sharalar patrıotızmge tárbıeleýge jáne aǵa býynǵa qurmet kórsetýge baǵyttalatyn bolady.

«Bizde gúl shoqtaryn qoıý rásimderi, eske alý is - sharalary, merekelik kontsertter ótkiziledi, ardagerlerge qurmet kórsetiledi», - dedi spıker.

Aqan Bıjanov soǵys ardagerleri men tyl eńbekkerlerine kómektesetin eriktilerge de toqtaldy.

«Bizdiń respýblıkamyzdaǵy eriktiler qozǵalysy óziniń birikse qandaı kúsh ekenin kórsetti. Ózderińiz biletindeı, bizdiń el Prezıdentiniń sheshimimen ótken jyl eriktiler jyly bolyp jarııalandy. Bul eriktiler qozǵalysynyń damýyna úlken serpin berdi. Jalpy, bizdiń qalada 5 myńnan astam erikti bar. Bizdiń eriktiler óz qyzmetin elimizdiń óte kúrdeli eki oqıǵasynda – pandemııa jáne sel tasqyny kezeńinde kórsetkenin atap ótkim keledi. Kómek kórsetý boıynsha aýdandyq jumyspen qamtý qyzmetterine, aýdandyq ardagerler keńesine júginý qajet. Biz bul jumysqa daıynbyz. Bizdiń qalamyzdyń kez kelgen azamaty osy qyzmetterge jáne osy qoǵamdyq uıymdarǵa júgine alady», - dedi ol.