Almatynyń 6 mektebinde seısmıkalyq tózimdilik jumystary júrgizilip jatyr

<p>ALMATY. KAZINFORM &ndash; Almatyda jańa mektepter men qosalqy nysan salynyp, keıbir bilim berý uıymdarynda seısmıkalyq tózimdilik jumystary júrip jatyr.</p>

Qala qurylysy basqarmasynyń málimetinshe, Jetisý aýdanynda ornalasqan №103 mektep - gımnazııa janynan 200 oryndy qosalqy nysanyń qurylysy júrip jatyr. Qajetti jabdyqtary bar oqýshy synyptarynan basqa, jobada ashana jáne aýmaqty qosymsha kógaldandyrý qarastyrylǵan. Jumystar jańa oqý jyly bastalǵanǵa deıin aıaqtalady.

Osy aýdanda №112 jalpy bilim beretin mektep janynan 300 oqýshyǵa arnalǵan ári sport zaly, ashanasy bar qosalqy nysan salynýda. Qurylys osy jyldyń sońynda aıaqtalady.

Túrksib aýdanynda 650 oryndy qosalqy nysany bar №59 mektep-gımnazııa kúrdeli jóndeýden ótip jatyr. Jobada ashana, kıim iletin oryn, 180 oryndyq aýdıtorııa, oqý sheberhanalary, mýltımedııalyq kabınetter jáne sport zaly qarastyrylǵan. Jumys mamyr aıynda bitedi.

Sondaı-aq, «Álmerek» shaǵyn aýdanyndaǵy №195 mektep ǵımaraty janynan 450 oryndy qosalqy nysannyń qurylysy bastaldy. Jobada mýltımedııalyq kabınetter, sport zaly, ashana jáne aýmaqty qosymsha kógaldandyrý kózdelgen. Nysandy 2025 jyldyń aqpan aıynda aıaqtaý josparda.

Naýryzbaı aýdanynyń «Shuǵyla» shaǵyn aýdanynda № 174 mektep ǵımaraty janynan 375 oryndyq qosalqy nysan salynyp jatyr. Jumystardy 2025 jyldyń aqpan aıynda aıaqtaý kózdelgen.

«Árbir qosalqy nysan - is júzinde jańa mektep. Qurylys kezinde zamanaýı materıaldar qoldanylady. Jumys sapasyn baqylaýǵa erekshe nazar aýdarylady. Sondaı-aq qalada №136, №138, №70, №10, №9 №155» seısmıkalyq kúsheıtý jáne mektepterdi kúrdeli jóndeý jumystary júrgizilýde», - dep atap ótti basqarmadan.

Budan basqa, osy jyldyń sońyna deıin Alataý aýdanynda eki mekteptiń qurylysy aıaqtalady. Birinshisi, 550 oryndyq «Saıaly – 2» shaǵynaýdanynda, ekinshisi, Zerdeli shaǵynaýdanynda da 550 oryndyq.