Almatylyqtardy skrınıngten ótýge robot shaqyrady
Qalalyq densaýlyq saqtaý basqarmasynan atap ótkendeı, bul jobanyń basty jańalyǵy - daýystyq robot júıesi naqty ýaqyt rejıminde jumys isteıdi.
Qazirgi ýaqytta emhanaǵa turǵyndardy profılaktıkalyq tekserýler men skrınıngke daýystyq robottar shaqyrady. Olar patsıenterge qońyraý shalady.
Osylaısha, medıtsına qyzmetkerleriniń negizgi jumys ýaqyty únemdeledi, emotsıonaldyq júkteme jane stress tómendeıdi, bul negizgi laýazymdyq mindetterdi sapaly oryndaýǵa múmkindik beredi.
«Adam pishindi robot qazaq jáne orys tilderinde sypaıy jáne kásibı dıalog júrgizedi. Robot qońyraý shalǵan kezde patsıenttiń qaı tilde jaýap bergenin kútip, keıin áńgimesin sol tilde jalǵastyrady. Jasandy ıntellektisi bar daýystyq robottar bizdiń emhananyń jumysynda óziniń tıimdiligin dáleldedi, sondyqtan bolashaqta jasandy ıntellekt halyqty profılaktıkalyq egýlerge, flıýorografııaǵa shaqyrý úshin, sondaı-aq kelip túsken jedel medıtsınalyq járdem aktıvteri boıynsha patsıentterge qońyraý shalý, qyzmet kórsetýdiń sapasy men ýaqtylylyǵyn baǵalaý jáne saqtandyrylmaǵan patsıenttermen mindetti medıtsınalyq kómek máseleleri boıynsha aqparattyq-túsindirý jumystaryn júrgizý úshin engiziletin bolady», - dep túsindirdi emhana dırektory Aızat Moldaqasymova.
Aıta keteıik, 12 sáýir kúni Memleket basshysy Qasym-Jomart Toqaev Ǵylym jáne tehnologııalar jónindegi ulttyq keńestiń otyrysynda jasandy ıntellektini elimizde damytý máselesine erekshe toqtalǵan bolatyn.
«Elimizde jasandy ıntellekt qaýipsizdik júıesi, medıtsına, bank qyzmeti, logıstıka, bilim berý salalaryna oıdaǵydaı engizilip jatyr. Osy tehnologııany meńgergen myqty kompanııalar da paıda boldy. Soǵan qaramastan, jasandy ıntellekt ındýstrııasyn odan ári damytý úshin memleket keshendi qoldaý kórsetýi kerek. Málimetter men tehnologııalyq ınfraqurylym barynsha qoljetimdi bolýy kerek. Sondyqtan qolaıly ekojúıe qalyptastyrý qajet. Sonymen qatar bizge jasandy ıntellektini damytatyn tıisti ınstıtýttar kerek. Qazir Úkimet Jasandy ıntellektini damytý strategııasyn jáne Tsıfrlyq kodeksti ázirlep jatyr. Bul qujattar atalǵan saladaǵy zertteý jumystaryna jáne ázirlemelerdi is júzinde qoldanýǵa jaǵdaı jasaýy kerek. Sondaı-aq bıznes pen joǵary oqý oryndary úshin tehnologııalyq ınfraqurylymdar men málimetter bazasyn qoljetimdi etýge tıis. Jasandy ıntellektini adamzat ıgiligine qyzmet etý úshin damytý mańyzdy. Sondyqtan etıkalyq standarttardy belgileý, málimetterdi qorǵaý jáne osy saladaǵy kıberqaýiptiń aldyn alý isine erekshe mán bergen jón», - degen edi Memleket basshysy.
Aıta keteıik, Qazaqstannyń IT kompanııalarynyń 1/3 bóligi Almatyda ornalasqan, onda 70 myńnan astam maman eńbek etedi. Almatyda ornalasqan Alataý ınnovatsııalyq tehnologııalar parki rezıdentteriniń ıdeıalary búginde álemniń 50-den astam elinde telekommýnıkatsııalarda, radıoelektronıkada qoldanylady. Qalalyq ІT ekojúıeni damytý baǵdarlamasynyń arqasynda irikteý jáne akseleratsııa baǵdarlamalary arqyly 400-den astam startap ótti, onyń 8-i sheteldik naryqqa shyǵaryldy, al ınvestıtsııalar 8,4 mln dollardan asty.
Megapolıste Almaty-Smart City tujyrymdamasy iske asyrylyp jatyr, ol azamattarǵa arnalǵan tsıfrlyq servısterdi qurý, qaýipsizdikti qamtamasyz etý, basqarý sheshimderin qabyldaý tıimdiligin jaqsartý jáne ınjenerlik ınfraqurylymdy tsıfrlandyrý jónindegi jobalardy qamtıdy. Almaty-Smart City-di damytýdyń zákirlik jobasy qalanyń tsıfrlyq egizi (Digital Twin) bolyp tabylady, ol neǵurlym aqyldy ári tıimdi qalalyq keńistik qurý úshin qalalyq ınfraqurylymdy modeldeýde, taldaýda jáne basqarýda negizgi qural bolady. Megapolıste 2022 jyldyń tamyzynan bastap Almatynyń biryńǵaı beınemonıtorıng júıesi jumys isteıdi, oǵan zamanaýı beınetaldaý servısteri kiredi, 30 myńnan astam kameranyń deregin taldaıdy. Bıyl jyl sońyna qaraı kamera sany 50 myń beınekameraǵa jetkiziledi, 2030 jylǵa qaraı 100 000 kamerany qosý josparlanyp otyr.
Sondaı-aq jyl saıyn ótetin Digital Almaty forýmy aıasynda ozyq tsıfrlyq jobalar kórmesinde tsıfrlandyrý salasyndaǵy otandyq jetistikter usynylady.