Almatylyqtar sý tasqynynan zardap shekkenderge 30 tonna gýmanıtarlyq kómek jóneltti

<p>ALMATY. KAZINFORM &ndash; Almatyda sý tasqynynan zardap shekken óńirlerge gýmanıtarlyq kómek jınaý jalǵasyp jatyr. Osy kúnge 30 tonna jóneltildi.</p>

Almaty qalasy Almaly komıýnıtı ortalyǵyna kelgen qala ákiminiń orynbasary Ásem Núsipova barsha eriktige qıyn-qystaý kezeńde kómek qolyn sozǵany úshin alǵys bildirdi. 
Aıtýynsha, zardap shekken otbasylar men aımaqtarǵa qoldaý kórsetý mańyzdy.

Foto: Almaty qalasy ákimdigi

«Prezıdent Qasym-Jomart Kemeluly Toqaev aıtqandaı – «Bizdiń kúshimiz – birlikte». Elimiz osy kúnderi aýyr synaqty bastan ótkerip jatyr. Dál osy sátte birligimiz ben eldigimizdi kórsetetin ýaqyt keldi. Eldegi bolyp jatqan bul tabıǵattyń tosyn minezine qatysty memleket tarapynan, Prezıdentimiz tarapynan barlyq tıisti sharalar qabyldanyp jatyr. Osy rette sý basqan aımaqtarǵa gýmanıtarlyq kómek jınap, úılestirip jatqan árbir janǵa alǵys bildiremin», - dedi Ásem Núsipova.

Eriktiler óz kezeginde gýmanıtarlyq kómekti tıimdi uıymdastyrýǵa baǵyttalǵan bastamasy men ıdeıasymen bólisti. Sonymen qatar, gýmanıtarlyq kómekti jınaý jáne taratý boıynsha qalamyzda taǵy qabyldaý pýnktin ashý boıynsha josparlar talqylandy.

Foto: Almaty qalasy ákimdigi

Almatydan sý tasqynynan zardap shekken Atyraý oblysynyń turǵyndaryna 30 tonnadan astam gýmanıtarlyq kómek jóneltildi. Onyń ishinde 12 tonna azyq-túlik, 10 tonnaǵa jýyq kıim-keshek, 7,2 tonna gıgıenalyq quraldar, 2 tonnadan astam turmystyq zattar, 200 keliden astam dári-dármek bar.

Foto: Almaty qalasy ákimdigi

Aıta ketý kerek, gýmanıtarlyq kómek jınalyp jatqan bul jastar komıýnıtı ortalyǵy Almatynyń ár aýdanynda ashylǵan 8 komıýnıtı ortalyqtyń biri. 
Almaty qalasyn damytýdyń 2025 jylǵa deıingi baǵdarlamasy aıasynda ár aýdanda ekiden, ıaǵnı barlyǵy 16 ortalyq ashylady.

Foto: Almaty qalasy ákimdigi

Árbir komıýnıtı ortalyq kreatıvti qoǵamdyq keńistikten turady. Munda jastardy qoldaýǵa qajettiniń bári bar: bul ártúrli memlekettik baǵdarlama boıynsha keńes berý, psıhologııalyq jáne zańgerlik kómek, NEET jastaryn qysqa merzimdi kýrstar arqyly suranysqa ıe mamandyqtarǵa oqytý jáne jumysqa ornalastyrý.

Gýmanıtarlyq kómek myna mekenjaı boıynsha qabyldanady:

Baıtursynova kóshesi, 22k1

Qabyldaý ýaqyty: 10:00-den 19:00-ge deıin

Kez kelgen adam Almaly aýdanyndaǵy komıýnıtı ortalyqqa habarlasyp, qajetti zattardy tapsyra alady.

Baılanys nómirleri: [phone]; 7 747 540 01 40