Almatylyq jastar esirtkini dárihanalardan satyp alyp jatyr

<p>Jańa adamdar Almaty qalasynyń dárihanalary boıynsha reıd júrgizdi. Tekseris barysynda esirtki quraldarynyń retseptsiz satylý jaǵdaılary anyqtaldy, dep habarlaıdy <a href="https://kaz.inform.kz/" target="_blank" rel="noopener">Kazinform.&nbsp;</a></p>

18-20 aralyǵyndaǵy jastar satyp alýshy rólin somdaǵan. Belsendiler jyldam táýeldi bolyp ketý yqtımaldyǵy joǵary bolatyn dárilerdi retseptsiz satyp alǵan. Táýeldi adamdar mundaı preparattardy esirtkige balama retinde paıdalanady. Tekserilgen 16 dárihananyń ekeýinde qyzmetkerler preparattardy retseptisiz satqan. Osy jaǵdaılar vıdeokameraǵa túsirildi.

Esirtkilik jáne psıhotroptyq áserdi beretin dáriler kóz aýrýlaryn, uıqysyzdyqty, psıhıkalyq aýytqýlardy emdeý jáne aýyrsynýdy basý úshin qoldanylady. Adamdar mundaı preparattardyń quramyndaǵy esirtkilik zattarǵa tez úırenip ketýi múmkin.

Zań boıynsha, mundaı preparattardyń retseptsiz satylýyna tyıym salynǵan. Táýeldi jastar osy dárilerdiń jaǵymsyz áseri týraly bile tura, solardy esirtki retinde paıdalanady. Kóp jaǵdaıda, mundaı «lázzat alý» úshin kóp aqsha kerek emes. Keı kezde farmatsevtter retsepttiń baryn tekserýdi umytady. Al keıbir dárihanalar buny múldem istemeıdi. Táýeldi satyp alýshylar arqyly kásipkerler tabysyn arttyryp jatyr.

«Almatyda esirtki máselesi ózekti kúıinde tur. Jańa adamdar esirtkilik dárilerdi retseptsiz satatyn dárihanalardy tekserý úshin qalada turaqty túrde reıd júrgizedi. Eger zańdy buzatyn oryndy bilseńiz, mekenjaıyn pikirge nemese dırektke jazýyńyzdy suraımyz. Biz mindetti túrde sizdiń jaýabyńyzdy qarastyramyz», - delingen habarlamada.