Almatylyq ýrologtar aýrýy asqynǵan 77 jastaǵy zeınetkerdi aman alyp qaldy

<p>ALMATY. KAZINFORM - Almatydaǵy Jetinshi aýrýhananyń ýrologtary nesep tas aýrýymen aýyratyn 77 jastaǵy naýqastyń ómirin saqtap qaldy</p>

Emdeý mekemesiniń baspasóz qyzmeti málim etkendeı, Almaty qalasynyń № 7 qalalyq klınıkalyq aýrýhanasynyń qabyldaý bólimshesine qart áıel óte aýyr jaǵdaıda tústi. Qatty aýyrsyný jáne ýlaný sındromy saldarynan jalpy jaı-kúıi aýyr dep baǵalandy. Terapevt, ýrolog, reanımatolog mamandar qarap, shaǵymdardy, klınıkalyq-zerthanalyq jáne aspaptyq zertteýlerdiń nátıjesin negizge alyp, naýqasty reanımatsııa bólimshesine shuǵyl túrde jatqyzdy.

«Naýqastyń óte aýyr jaǵdaıy, negizgi aýyr dıagnozǵa baılanysty - búırek pen nesepaǵardyń bitelýimen birge júretin gıdronefroz (nesep-tastyń qaýipti asqynýy), onyń asqynýlary men qatar júretin aýrýlary (jiti irińdi tsıstıt, ýrosepsıs, nesepaǵardyń ýrolıtııazy, pıelonefrıt, gıpertonııa, jańadan anyqtalǵan qant dıabeti, ekinshilik trombotsıtopenııa, ekinshilik anemııa), bul aýrýdyń klınıkasyn odan ári aýyrlatady. Ýrosepsıstiń ómirge qaýip tóndiretin asqynýy qant dıabeti aıasynda ınfektsııalyq-ýyttyq shokqa ulasyp, onyń saldary ólimge ákelýi múmkin», - dedi № 7 qalalyq klınıkalyq aýrýhanasynyń ýrologııa bólimshesiniń meńgerýshisi Erkebulan Tólegenov.

Naýqastyń emin baqylaýshy ýrolog-dáriger Erlan Qońyrovtyń aıtýynsha, zárdiń shyǵýyn qalpyna keltirý boıynsha tehnıkalyq jaǵynan kúrdeli ota jasaldy. 

«Operatsııa kezinde nesep jolynyń strıktýrasy ortasha úshten bir deńgeıde boldy jáne tehnıkalyq qıyndyqtarmen ishki stent – kateter ornatyldy, bul zárdiń shyǵýyn qalpyna keltirdi», - dep atap ótti dáriger.

Patsıenttiń operatsııasy mindetti áleýmettik medıtsınalyq saqtandyrý aıasynda jasaldy. Patsıent 8 táýlikten keıin qanaǵattanarlyq jaǵdaıda statsıonardan shyǵaryldy.