Almatylyq robot qurastyrýshy oqýshylar Hıýston men Londonǵa barady

<p>ALMATY. KAZINFORM &ndash; Robototehnıkanyń qyr-syryn jetik meńgergen almatylyq oqýshylar Hıýston men Londonda ótetin halyqaralyq týrnırge joldama jeńip aldy.</p>

Astana qalasyndaǵy ál-Farabı atyndaǵy oqýshylar saraıynda ótken dodaǵa Qazaqstannyń ár óńirinen 3 myńnan astam oqýshy, álemniń túrli elderinen 200-den astam komanda qatysty. Almaty qalasynyń namysyn qorǵaǵan oqýshylar birneshe júldeli oryndarǵa ıe boldy.

Jarys qorytyndysy boıynsha №124 mekteptiń «Team 124» komandasy «Winning Alliance 2nd pick» jáne «THINK AWARD 2st place» nomınatsııasyn jáne Londonda ótetin halyqaralyq «UK first championship 2024» jarysyna qatysýǵa joldama aldy. Al, №206 mektep-gımnazııasynyń oqýshysy Ońǵarbek Tomırıs AQSh-tyń Hıýston qalasynda ótetin «2024 FIRST Championship, Houston» jarysyna qatysýǵa sertıfıkat jeńip aldy. 

Sondaı-aq Almaty mektepteriniń túlekteri elimizdiń bedeldi joǵary oqý oryndarynyń grant ıegerleri atandy. Atap aıtar bolsaq, BIL lıtseıiniń oqýshysy Spandııar Tuıaqbaı jáne №39 mamandandyrylǵan lıtseıiniń oqýshysy Malıkov Meıirjan Sátbaev ýnıversıtetine tegin oqıtyn múmkindikke ıe boldy. Sonymen qatar M.Bazarbaev atyndaǵy №138 gımnazııa oqýshysy Amangeldi Sholpan, №81 mektep-gımnazııa oqýshysy Álrahat Úmithan, №140 M.Maqataev atyndaǵy gımnazııa oqýshysy Nurıla Berdaly men Móldir Bekenqyzy, №178 mamandandyrylǵan lıtseıiniń oqýshysy Oljas Sanatuly AÝES-ke grant utyp aldy. 

Eýropalyq oqý oryndaryna túsýge 100% jeńildikpen qoldaý kórsetý granty №200 mektep-gımnazııasynyń oqýshysy Mıra Demeýǵalıeva men №178 mamandandyrylǵan lıtseıiniń oqýshysy Alýa Tólendige berildi.