Almatylyq qutqarýshylar men kommýnaldyq qyzmetter kúsheıtilgen qyzmetke kóshti

<p>ALMATY. KAZINFORM &ndash; Almatyda aýa raıynyń nasharlaýyna baılanysty qalanyń kommýnaldyq qyzmetteri men elektr brıgadalary kúsheıtilgen rejımge aýysty. Al qalanyń tótenshe jaǵdaılar departamenti joǵary daıyndyq deńgeıine keltirildi.</p>

Almatyda keshke bastalǵan ótkinshi jańbyrdyń arty nóser jaýynǵa ulasty, bul naýryz aıynda ortasha aılyq normanyń 28%-y (72 mm).

«Sýdyń aryqtarmen kedergisiz aǵyp ketýin qamtamasyz etý úshin túngi aýysymǵa 49 jedel kezekshi mobıldi brıgada shyqty. Onyń ishinde «Almaty Tazalyq» kásipornynyń 33 brıgadasy bar. Kezekshi brıgadalar sý basýǵa beıim ýchaskelerge ýaqytyly shyǵaryldy. Qulaǵan aǵashtar dereý tazalanady. Kezekshilikke barlyǵy 344 birlik arnaıy tehnıka, 21 motopompa jáne 163 jumysshy shyqty. Qosymsha 2 300 qap qum daıyndaldy», - dep habarlady Almaty ákimdiginiń baspasóz qyzmeti.

Ákimdik sondaı-aq aldaǵy kúnderi aýa raıynyń nasharlaýyna baılanysty kólik júrgizýshilerge aǵashtardyń qulaý jáne elektr jelileriniń úzilý qaýpine baılanysty kólikterdi joldardyń jıegine qoımaýǵa keńes berdi. Sý tasqynyn boldyrmaý úshin turǵyndardy aryq pen kanaldy qoqysqa toltyrmaýǵa shaqyrdy. 

Foto: Almaty ákimdigi

Eger qandaı da bir aýmaqty sý bassa, jedel den qoıý sharalaryn qabyldaý úshin aýdan ákimdikterine habarlasýǵa bolady. Sondaı-aq ákimdikte aýa raıynyń nasharlaýyna baılanysty qalada elektr qýaty, onyń ishinde syrtqy jaryqtandyrý jelilerinde apattyq ajyratýlar bolýy múmkin ekenin eskertti. «Almaty Qala Jaryq» jáne «Alataý Jaryq Kompanııasynyń» apatty brıgadalary kúsheıtilgen rejımde jumys istep jatyr. Kezekshi brıgadalar barlyq ótinishke jedel den qoıady jáne aqaýlardy tez arada joıý úshin jumys isteıdi. Barlyq ajyratý týraly aqparatty «AJK» AQ-nyń www.azhk.kz resmı saıtynda Almaty qalasynyń elektr energııasyn ajyratýdyń ınteraktıvti kartasy bóliminen alýǵa bolady.

Elektrmen jabdyqtaýdyń úzilý sebepterine qatysty aqparatty jedel usyný maqsatynda «AlmatyEnergoSbyt» JShS-nyń baılanys ortalyǵy: 356-99-99 telefon nómirine, syrtqy jaryqtandyrý jelilerinde ajyratýlar bolǵan jaǵdaıda «Almaty Qala Jaryq»-tyń 8771-718-24-39, 8771-718-24-56, 390-20-40, 390-20-60 nómirlerine habarlasýǵa bolady. Dıspetcherlik pýnktter táýlik boıy jumys isteıdi.

Almatyda sondaı-aq azamattyq qorǵaý qyzmetteri, merdigerlik uıymdar daıyndyqqa keltirildi. Qalalyq TJD-nyń kúshteri men quraldary qyzmet ótkerýdiń kúsheıtilgen nusqasyna aýysyp, joǵary daıyndyq deńgeıine keltirilip, jedel top jumysy quryldy.

Almatyda aýa raıynyń qolaısyzdyǵyn baılanysty 8 727 278 20 83 jáne 8 727 278 20 84 nómiri boıynsha jedel jeli iske qosyldy.

Eske salaıyq, búgin Almatyda jel kúsheıip, shańdy daýyl turdy. Saldarynan qalada shań men qum kóterdi. Daýyldyń arty jańbyrǵa ulasty. 

Sondaı-aq qolaısyz aýa raıyna baılanysty Almaty halyqaralyq áýejaıynda birqatar reıs keshikti.